संस्कार नभएका संस्कृतिमन्त्री- कोही छाडा बोल्ने, कोही लाइन मिच्ने

काठमाडौं। एक वर्षअघि २४ असोजमा नेपाल कम्युनिस्ट पार्टी (एकीकृत समाजवादी)का अध्यक्ष माधवकुमार नेपालले आफ्नो पार्टीबाट नवनियुक्त मन्त्रीहरूलाई कडा निर्देशन दिए, ‘विवादित र बदनाम हुने काम नगर्नुहोस्।’’

पार्टी केन्द्रीय कार्यालयमा मन्त्रीहरूलाई बोलाएर अध्यक्ष नेपालले लामै समय खर्चिएर ‘पदीय मर्यादा र गरिमा विपरीतका काम नगर्न’ सचेत गराए।

तर, नेकपा (एस)का मन्त्रीहरू अध्यक्ष नेपालले ‘जे नगर्नु भनेका थिए, त्यही गर्दै विवादमा तानिँदै’ आएका छन्। विषेशगरी संस्कृति, पर्यटन तथा नागरिक उड्डयनमन्त्री बढी विवादमा तानिँदै आएका छन्। शेरबहादुर देउवा नेतृत्वमा सरकार गठनको क्रममा यो मन्त्रालय नेकपा ( एस )को भागमा परेको थियो। नेकपा(एस)बाट सो मन्त्रालयमा जुन मन्त्री बनेपनि विवादमा आउन छाडेनन्।

नेपाली शब्दकोश अनुसार संस्कृतिको शब्दार्थ छ– ‘उत्तम या सुध्रेको स्थिति।’  यो सुधार समाजका सोच्ने, विचार गर्ने, कार्य गर्न, खान–पिउने, बोल्न, आदिमा लक्षित हुन्छ।

तर, (नेकपा एस)का संस्कृति मन्त्री भने यसको ठिक विपरीत ‘असभ्य’ भएर निस्किए। अघिल्ला पर्यटन तथा संस्कृति मन्त्री प्रेम आलेदेखि अहिलेका जीवनराम श्रेष्ठसम्म विभिन्न हर्कतका कारण विवादमा छन्।

नाम संस्कृति मन्त्री, काम असभ्य

अघिल्ला मन्त्री आले पदमा रहुन्जेल विवादमा मुछिए। भारतमा बस्ने नेपाली यूवा जगत ओलीसँगको अपाच्य संवाद होस या वायुसेवा निगमका पदाधिकारीलाई दिएको निर्देशन । उनको अडियो भिडियो सामाजिक सञ्जालमा भाइरल नै बन्यो।

आलेले ‘अपहरण र ज्यान मार्ने’ धम्की मात्र दिएनन्, सुन्नै नसकिने गरी छाडा (अश्लील ) बोलेका थिए। भिडिओ भाइरल भएपछि मन्त्री आलेले माफी माग्नुको साटो तथ्यहीन आरोप बताएर लाज पचाए।

आफ्ना कार्यकर्तालाई जागिर नलगाइदिएको भन्दै नेपाल एयरलाइन्सका अध्यक्ष युवराज अधिकारीलाई हातपात गर्नुकासाथै अश्लील गाली गरे। आलेले अधिकारीलाई गर्नुसम्म अपमानित गरेको अडिओ बाहिरिएपछि धेरैलाई लागे आले सुध्रिएनन्।

मन्त्री आलेले सुरुमा फोनमा तथानाम गाली गर्छन्। पछि उनलाई भेट्न गएका अधिकारीलाई आफ्नै कार्यकक्षमा हातपात गर्दै त्यस्तै फोहोरी शब्दहरू प्रयोग गरेको अडिओमा सुनिन्छ।

आलेले नाता गोता तथा कार्यकर्तालाई मन्त्रालय मातहतका विभिन्न निकायमा जागिर खुवाएकोलगायतका धेरै विवाद पनि खेपे। उनी पदमा रहुन्जेल विवादमुक्त हुन सकेनन्।

अनुशासन सिकाउनेलाई नै डन्डा चलाउने संकृतिमन्त्री

संस्कृति तथा अनुशासन सिकाउनेमाथि नै बहालवाला संस्कृतिमन्त्री श्रेष्ठले कारबाहीको डन्डा चलाएका छन्, त्यो पनि पदको दम्भ देखाउँदै। मन्त्रीलाई पनि सामान्य मानिसको जस्तै नियम लागु हुने भन्दै आफूलाई लाइनमा बस्न आग्रह गरेपछि सुरक्षागार्ड शेरजंग गुरुङलाई मन्त्रीले पक्राउ गराए।

आइतबार ठमेलस्थित छायाँ सेन्टरमा रहेको भीएफएस ग्लोबल भिसा सेन्टरमा श्रीमतीसहित आफन्त लिएर ठमेलस्थित छायाँ सेन्टरमा पुगेका थिए मन्त्री। सुरक्षागार्डले सुसंस्कृत रूपमा अनुशासन पालना गर्दै लाइनमा बस्न आग्रह गरे।

तर, मन्त्रीले लाइन मिच्दै अगाडि जान खोजे। उनले दम्भ देखाउँदै भने, ‘‘म मन्त्री हुँ भाइ, मलाई बस्न लगाउने?’’ मन्त्री श्रेष्ठ गार्डलाई पेलेरै भिसा सेन्टर छिरेपछि गृहमन्त्रालयमा फोन गरे। आफूलाई लाइनमा बस्न लगाउने सुरक्षा गार्डलाई पक्राउ गर्न निर्देशन दिए।

पक्राउ परेका सुरक्षा गार्डमाथि ‘अभद्र व्यवहारको कसूरमा म्याद थप गरेर अनुसन्धान सुरु गरिएको छ।