मुख्यमन्त्री राउतका स्वकीय सचिव भन्छन, “अध्यक्षले राजीनामा मागेको समाचारमा सत्यता छैन”

काठमाडौं । जनता समाजवादी पार्टीका अध्यक्ष उपेन्द्र यादवले मधेस प्रदेशका मुख्यमन्त्री लालबाबु राउतको राजीनामा मागेको भन्ने खवरले राजनीति एकाएक तातिएको छ ।

अध्यक्ष यादवले साइकल खरिद प्रकरणलाई लिएर मुख्यमन्त्री राउतको राजीनामा मागेको भन्दै केही सञ्चारमाध्यममा समाचार आएको थियो । तर मुख्यमन्त्री राउतका स्वकीय सचिव जितेन्द्र यादवले भने राजीनामा मागेको समाचारमा कुनै सत्यता नभएको बताएका छन् ।

सोमबार बेलुका नेपाल भ्युजसँग कुरा गर्दै यादवले नियोजित रुपमा कतिपय सञ्चार माध्यमले राजीनामा मागेको हल्ला चलाएको दाबी समेत गरेका छन् । अब कार्यकाल सकिनै लाग्दा मुख्यमन्त्रीको राजीनामा मागियो भनेर भ्रमपुर्ण रुपमा समाचार आएको उनको भनाइ छ ।

आफूले आजै मुख्यमन्त्री राउतसँग भेटेर कुरा गर्दा राजीनामा मागेको समाचारमा सत्यता नभएको बताएको पनि यादवले जनाए । यसबारे मुख्यमन्त्री राउतसँगै बुझ्न हामीले सम्पर्कको प्रयास गरेका थियौं । तर उनको मोबाइल अफ गरिएको छ ।

जसपाको मधेस प्रदेशका सचिव समेत रहेका स्वकीय सचिव यादवले मुख्यमन्त्रीलाई लिएर पार्टीमा केही असन्तुष्टि भने रहेको बताए । तर त्यसले राजीनामा माग्ने अवस्था भने सिर्जना नगरेको उनको दाबी छ ।