‘बूढो समय’ लिएर आए यात्री 

काठमाडौं। युवाकवि बाबुराम श्रेष्ठ ‘यात्री’ को दोस्रो काव्यकृति ‘बूढो समय’ को विमोचन समारोहमा केवल कविको काव्यिक–धरालतको उत्खनन मात्र भएन, नेपाली कविताको पूर्ववर्तीदेखि वर्तमानसम्मका प्रवृत्तिमाथि मिहीन रूपले शल्यक्रियासमेत गरियो।

शनिबार राजधानीमा आयोजित सो काव्यकृति विमोचन समारोहमा प्रमुख अतिथि वरिष्ठ गीतिसर्जक एवं समालोचक डा कृष्णहरि बरालले आफ्नो मन्तव्य राखेपछि तीन जना समालोचक डा ज्ञानु अधिकारी, महेश पौड्याल र सुरेश किरणले नेपाली कवितामाथि लामै बहस गरे, जसलाई सहजीकरण गरेका थिए, युवाकवि रामगोपाल आशुतोषले।

प्रमुख अतिथि डा बरालले भने, ‘कविताको भाषा सामान्य भाषाभन्दा फरक हुन्छ। बाबुरामका अधिकांश कवितामा प्रगतिवादी चेतना पाइन्छन् भने आलोचनात्मक यथार्थवादी चिन्तन पनि उनका कवितामा पाइन्छन्।’

काव्यकृतिको चिरफार गर्ने क्रममा समालोचक डा अधिकारीले भनिन्, ‘समसामयिकताबोध, राजनीति र नेतृत्वप्रति वितृष्णा, गाउँप्रति अधिक स्नेह र सहरप्रति घृणाभाव, अस्तित्व र युगचेतना उनका कवितामा प्रखर रुपमा आएका छन्।’

कार्यक्रममा कवि यात्रीले आफ्ना केही कविता वाचन गरेका थिए भने उनका कविताहरु कवित्रय सञ्जय सुमन, विक्रम परियार र देवकी अभिलाषीले वाचन गरेका थिए।

कवि यात्रीको २०६३ सालमा पहिलो काव्यकृति ‘देशस्वप्न’ प्रकाशित भएको थियो। प्राध्यापन पेसामा आबद्ध सिन्धुलीका यात्री मरिण साहित्य समाजको अध्यक्ष रहनुका साथै सिन्धुली वाङ्मय प्रतिष्ठानलगायत संस्थासँग आबद्ध छन्।
००