आर्थिक सहयोगको लागि पाकिस्तानी सेना प्रमुखले गुहारे साउदी अरब र यूएई

नयाँ दिल्ली। पाकिस्तानका सेनापति कमर जावेद बाजवाले यूएई र साउदी अरबसँग ऋण सहयोग मागेका छन् । यसअघि आईएमएफको ऋणको लागि अमेरिकासँग सहयोग मागेका सेना प्रमुख बाजवाले यसपटक साउदी र यूएईसँग याचना गरेका भारतीय एनडीटीभीको अनलाइन संस्करणले जनाएको छ ।

द एक्सप्रेस ट्रिब्युनका अनुसार पाकिस्तानका प्रधानमन्त्री शहबाज सरिफले यसअघिको आफ्नो भ्रमणका क्रममा साउदी र यूएईसँग ऋण सहयोग मागेका थिए तर ति देशले ऋण दिन आनाकानी गरिरहेका छन् ।

पाकिस्तानी सेना प्रमुखले साउदी र यूएईका अधिकारीसँग फोन वार्ता गरेर ऋण सहयोगको माग गरेका छन् । पाकिस्तानमा विदेशी मुद्रा सञ्चिति घट्दै गएको छ । दाताले ऋण दिन छाडेका छन् ।

देश आर्थिक संकटतर्फ जान थालेपछि सरकारले विलासी वस्तु आयातमा कडाइ गरेको छ । एक मन्त्रीले त नागरिकलाई चिया कम पिउन आग्रह गरेका छन् ।