जोहोन्सबर्गको बारमा गोली हानाहान, कम्तीमा १४ जनाको मृत्यु

दक्षिण अफ्रिकी शहर जोहानेसबर्ग नजिकै रहेको सोवेटो टाउनसिपमा रहेको बारमा भएको गोली हानाहानमा कम्तीमा १४ जनाको मृत्यु भएको छ।

शनिबार-आइतबारको मध्यरातमा घटना भएको र बिहान प्रहरीलाई खबर आएको प्रहरीले जनाएको छ।

प्रहरी त्यहाँ पुग्दा १२ जनाको मृत्यु भइसकेको थियो। ११ जनालाई अस्पताल लगिएको थियो, जहाँ थप २ जनाको मृत्यु भएको थियो।

घटनास्थलमा भेटिएको कारतूसले आक्रमणकारी भीडमा आएको देखाएको प्रहरी अधिकृत इलियास मावेलाले बताए। पूरै क्षेत्र सिल गरिएको छ र घटनाको अनुसन्धान भइरहेको छ।

घटनास्थलमा उपस्थित केही प्रत्यक्षदर्शीले राति एक बजेतिर मिनिबस ट्याक्सीमा सवार केही व्यक्तिको भीड बारमा पुगेर गोली चलाउन थालेको बताए।

गोली चल्नेबित्तिकै भागदौड मच्चिएको थियो र मानिसहरू भाग्न थालेका थिए। यो आक्रमण किन गरियो भन्ने जानकारी आइनसकेको अन्तर्राष्ट्रिय सञ्चारमाध्यमले जनाएका छन्।