मन्त्री फेरबदलको निर्णयले एकीकृत समाजवादीभित्र तीव्र हलचल

काठमाडौं। नेकपा (एकीकृत समाजवादी)का नेता मेटमणी चौधरीले आज (बिहीबार) दिउँसोसम्म आफूहरुको शपथका विषयमा थप जानकारी आउने बताएका छन्। एकीकृत समाजवादीले २२ जेठमा नै आफ्नो पार्टीबाट मन्त्री रहेका नेताहरुलाई सरकारबाट फिर्ता बोलाउँदै नयाँ मन्त्रीहरुको नाम प्रधानमन्त्री कार्यालयमा पठाएको थियो।

२३ जेठमा एकीकृत समाजवादीका नयाँ मन्त्रीहरुको शपथ ग्रहणको तयारी भए पनि अन्तिम समयमा आएर सत्तारुढ दलले नै तत्काल मन्त्रिमण्डल परिवर्तन नगर्ने निर्णय गरेको थियो। सत्तारुढ दलले यस्तो निर्णय गरेसँगै एकीकृत समाजवादीबाट मन्त्री बन्ने तयारीमा रहेका नेताहरुको शपथ ग्रहण हुन सकेको थिएन।

एकीकृत समाजवादीका सम्मानित नेता झलनाथ खनालदेखि अध्यक्ष माधव नेपालसम्मले आफ्नो पार्टीबाट मन्त्री भएका नेताहरु फिर्ता आउने र नयाँले अवसर पाउने दाबी गर्दै आएका छन्। प्रस्तावित शहरी विकासमन्त्री चौधरीले आजै आफूहरुको शपथ हुने दाबी गर्दै आए पनि उनी आफै शपथका विषयमा अन्योलमा छन्। “आज हामीहरुको शपथ हुन्छ भन्ने जानकारी आएको थियो, अपराह्नसम्म यस विषयमा थप जानकारी आउँछ।”

एकीकृत समाजवादीले आफ्नो पार्टीबाट मन्त्री बनेका पाँच नेतालाई फिर्ता बोलाउँदै उनीहरुको स्थानमा नयाँ मन्त्री सरकारमा पठाउन चाहेको थियो। पार्टीले आफ्ना मन्त्री परिवर्तन गर्न चाहे पनि संसद्मा हाल आर्थिक वर्ष २०७९/८० को बजेटका विषयमा छलफल चल्दै गरेका कारण तत्काल मन्त्रिमण्डल परिवर्तन नगर्ने सत्तारुढ दलको निर्णयसँगै पार्टी आफ्नो पूर्व निर्णयबाट फिर्ता भएको थियो।

मन्त्री परिवर्तन गर्ने निर्णयसँगै भदौ २०७८ मा गठन भएको पार्टीभित्र विवाद उत्पन्न भएको छ। एकीकृत समाजवादीबाट मन्त्री रहेका नेताहरु सरकारबाट फिर्ता हुन नचाहने र मन्त्री पदमा सिफारिस व्यक्तिहरु जसरी पनि मन्त्री बन्ने तरखरमा छन्।

पार्टीका अध्यक्ष नेपालले आफ्ना पार्टीबाट मन्त्री भएका नेताहरु सहमतिमा नै सरकारबाट फिर्ता हुने निरन्तर दोहर्‍याइरहेका छन्। प्रधानमन्त्री शेरबहादुर देउवाको आग्रहमा केही दिनका लागि मन्त्री फेरबदल रोकेको बताउने नेपाल बजेटका विषयमा संसद्मा छलफल सकिए लगत्तै आफ्ना पार्टीबाट मन्त्री भएका नेता फिर्ता आउने र नयाँले अवसर प्राप्त गर्ने बताउँछन्। पार्टीका अध्यक्ष नेपालले यस्तो दाबी दोहोर्‍याइरहँदा एकीकृत समाजवादीबाट मन्त्री बनेका नेताहरुले नेकपा माओवादी केन्द्रका अध्यक्ष पुष्पकमल दाहालसँग पनि भेटेका छन्।

एकीकृत समाजवादीबाट मन्त्री भएका नेताहरुले बुधबार (२५ जेठ)मा माओवादी केन्द्रका अध्यक्ष दाहाललाई सामूहिक रुपमा भेटेका हुन्। यसअघि पार्टीले २२ जेठमा मन्त्रीबाट फिर्ता बोलाउने निर्णय गरेसँगै एकीकृत समाजवादीका नेताहरु माओवादी केन्द्रका अध्यक्ष दाहाललाई भेट्न खुमलटारस्थित दाहाल निवास पुगेका थिए।

नयाँ मन्त्रीको शपथ हुने भनिएको दिन अर्थात २३ जेठमा एकीकृत समाजवादीबाट मन्त्री भएका नेताहरुले प्रधानमन्त्री देउवालाई समेत भेट्दै बजेट अधिवेशन शुचारु रहेका कारण मन्त्रिमण्डल परिवर्तन नगर्न आग्रह गरेका थिए। लगत्तै बसेको सत्तारुढ दलको बैठकले तत्काल मन्त्रिमण्डल परिवर्तन नगर्ने निर्णय भएको थियो।

एकीकृत समाजवादीले संस्कृति, पर्यटन तथा नागरिक उड्डयनमन्त्री प्रेम आलेका ठाउँमा पार्टीका प्रमुख सचेतक जीवनराम श्रेष्ठलाई मन्त्री बनाउने निर्णय गरेको छ।

हाल शहरी विकासमन्त्री रहेकी रामकुमारी झाँक्रीको स्थानमा मेटमणि चौधरीलाई नयाँ मन्त्री बनाउने पार्टीले निर्णय गरेको छ। यस्तै, विरोध खतिवडा मन्त्री रहेको स्वाथ्य मन्त्रालयमा एकीकृत समाजवादीले भवानी खापुङलाई पठाउने निर्णय गरेको छ, जो सोही मन्त्रालयमा राज्यमन्त्री छन्।

हाल किसान श्रेष्ठ रहेको श्रम, रोजगार तथा सामाजिक सुरक्षामन्त्रीमा शेरबहादुर कुँवरलाई मन्त्री बनाउने पार्टीले निर्णय गरेको छ। उनी गैरसांसद् हुन्। हीरा केसीलाई स्वास्थ्य राज्यमन्त्री बनाउने पार्टीले निर्णय गरेको छ।