मतदान शुरु हुनै लाग्दा दोलखाको बैत्यश्वरमा झडप, प्रहरीद्वारा दुई राउण्ड हवाई फायर

दोलखा। दोलखाको बैत्यश्वर गाउँपालिकाको वडा नं १ र २ को मतदान केन्द्रमा झडप भएको छ। झडप भएपछि स्थिति नियन्त्रणमा लिन प्रहरीले दुई राउण्ड हवाई फायर गरेको छ।

ती स्थानमा गएरातिदेखि नै नेकपा एमाले, नेपाली कांग्रेस र नेकपा माओवादी केन्द्रका नेता कार्यकर्ताबीच त्रिपक्षीय भिडन्त भएको थियो। सोही बिबादका कारण अहिले त्यहाँ मतदान रोकिएको छ।

झडप र हवाई फायरपछि रोकिएको मतदान शुरु गराउन सर्वदलीय बैठक जारी रहे पनि होहल्ला नरोकिएको त्यहा उपस्थित एक स्थानीयले जानकारी दिए।

मतदानस्थलमा बाहिरबाट त्रिपक्षीय भिडन्त र ढुंगा हानाहान भएपछि प्रहरीले स्थिति नियन्त्रणमा लिन दुई राउण्ड हवाई फायर गरेको जिल्ला प्रहरी कार्यालय दोलखाले जनाएको छ।

प्रहरीका अनुसार दोलखामा प्रत्येक चुनावमा कांग्रेस, एमाले र माओवादी तीनै पार्टीका उम्मेदवारले बुथ कब्जाको प्रयास गर्ने गरेका छन्।