एआईजीमा बढुवाका लागि पौडेल सिफारिस

सशस्त्र प्रहरी नियमावली, २०७२ को नियम ३९ को उपनियम (१) को (क) बमोजिम बढुवा समितिको बुधबार बसेको बैठकले पौडेललाई बढुवाका लागि सिफारिस गरेको हो।

नेपालभ्युज

काठमाडौं। सशस्त्र प्रहरी बलका प्रहरी नायब महानिरीक्षक (डीआईजी) नारायणदत्त पौडेललाई प्रहरी अतिरिक्त महानिरीक्षक (एआईजी) पदमा बढुवाका लागि सिफारिस गरिएको छ।

सशस्त्र प्रहरी बलको रिक्त रहेको दुई एआईजी पदमध्ये वरीयतामा अगाडि रहेका पौडेललाई मात्र बढुवाका लागि सिफारिस गरिएको हो।

सशस्त्र प्रहरी बलमा एआईजी राजु अर्याल महानिरीक्षक र अर्का एआईजी रामशरण पौडेलले अवकाश पाएपछि दुई पद रिक्त थियो।

बढुवा सिफारिसउपर चित्त नबुझ्ने सशस्त्र प्रहरी नायब महानिरीक्षकले नियमावलीको ५५ मा व्यवस्था भएबमोजिम सात दिनभित्र बढुवाउपरको उजुरी सुन्ने समितिसमक्ष उजुरी दिन सकिने छ।