रूसमा इन्टेलको सबै व्यापार बन्द

एजेन्सी। कम्प्युटर कम्पोनेन्ट र इलेक्ट्रोनिक उपकरणहरूको विश्वको सबैभन्दा ठूलो उत्पादकमध्ये एक अमेरिकी टेक्नोलोजी कम्पनी इन्टेलले युक्रेनको अवस्थालाई लिएर रूसमा आफ्ना सबै प्रकारका व्यापारिक गतिविधिहरू स्थगित गरेको जनाएको छ।

“तत्काल हामीले रूसमा सबै व्यापार सञ्चालनहरू निलम्बित गरेका छौँ,” कम्पनीले भनेको छ।

इन्टेलले आफ्ना विश्वव्यापी सञ्चालनहरूमा अवरोध कम गर्न व्यापार निरन्तरताका उपायहरू पनि लागू गरेको जनाएको छ।

“रूसमा रहेका हाम्रा एक हजार २०० कर्मचारीहरू सहित हाम्रा सबै कर्मचारीहरूलाई यो कठिन परिस्थितिबाट सहयोग गर्न आग्रह गरिरहेका छौं,” कम्पनीले भनेको छ।

रूसले युक्रेनमा गत २४ फेब्रुअरीमा डोनेट्स्क र लुहान्स्क जन गणतन्त्रहरूले युक्रेनी सेनाको तीव्र आक्रमणबाट सुरक्षाका लागि गरेको आह्वानको जवाफमा युक्रेनमा विशेष सैन्य कारबाही शुरु गरेको थियो।

रूसी रक्षा मन्त्रालयले युक्रेनी सैन्य पूर्वाधारलाई लक्षित गर्ने विशेष अपरेसनको उद्देश्य युक्रेनलाई “असैनिकीकरण’ गर्ने बताएको छ।

मस्कोले युक्रेन कब्जा गर्ने कुनै योजना नरहेको बताएको छ। तर, पश्चिमा राष्ट्रहरुले रूसमाथि थुप्रै प्रकारका प्रतिबन्धहरू लगाएका छन्।