पाँचओटा दल किलाका ढक हुन्, एमाले क्विन्टलको : ओली

काठमाडौं। नेकपा एमालेका अध्यक्ष केपी शर्मा ओलीले स्थानीय तहको निर्वाचनमा सबै दल मिलेर आए पनि एमालेले जित्ने बताएका छन्। भक्तपुरको सूर्यविनायकमा व्यवसायी तथा नेकपा एमालेका केन्द्रीय सदस्य दुर्गा प्रसाईंले शुरु गरेको कृषि तथा तरकारी बजारको उद्घाटन गर्दै उनले सत्ता साझेदार पाँचओटा दलहरूले चुनावी गठबन्धन गरे पनि एमालेले चुनाव जित्ने बताए।

‘‘उहाँहरूले गठबन्धन नगरी एमालेसँग जित्न सकिँदैन भन्ने त बुझ्नुभयो ठीक छ गठबन्धन गरे पनि एमालेसँग जित्न सकिँदैन त्यो कुरा हामी बुझाउँछौं,” उनले भने, ‘‘पाँचओटा दल एक/एक किलाका ढक हुन् एमाले क्विन्टलको।” उनले कुनै पनि दल एक्लै लड्न आए एमालेलाई जित्न नसक्ने दाबी गरे। उनले भने, ‘‘साह्रै बच्चा भयो भने हामीलाई पनि गाह्रो हुन्छ, बच्चा बच्चासँग निहुरिएर कता लडाईं गर्ने? त्यै भएर पाँच जना काँधमा चढेर बराबर भएर आए लड्न पनि सजिलो हुन्छ।”

उनले गठबन्धन भइहाले पनि त्यो नटिक्ने बताए।

प्रसाईंले दुई अर्ब रुपैयाँको लागतमा उक्त बजार सञ्चालनमा ल्याएका हुन्। झण्डै ५० रोपनी क्षेत्रफलमा फैलिएको उक्त बजार अहिलेसम्मकै ठूलो हो। सूर्यविनायक र जगातीबीचको अरनिको राजमार्गसँगै जोडिएको सूर्यविनायक नगरपालिका–८ मा तरकारी बजार सञ्चालनमा ल्याइएको हो। बजारमा दुई हजार २०० कक्ष रहेका छन्।

चार हजार ४०० जनालाई रोजगारी दिने तथा स्थानीय किसानको तरकारी उचित मूल्यमा खरीद गरी उपभोक्तालाई सुपथ मूल्यमा उपलब्ध गराउने उद्देश्यले बजार स्थापना गरिएको सञ्चालक प्रसाईँले बताए।