निर्वाचनमा साना दललाई ‘पुरानै चिह्न’

काठमाडौं। स्थानीय तह चुनावमा साना ७३ दलले पहिलेकै निर्वाचन चिह्न पाउने भएका छन्। निर्वाचन आयोगले यसबारे परामर्श थालेको छ। राष्ट्रिय पार्टीबाहेकले स्वतन्त्र चिह्नबाट निर्वाचनमा भाग लिनुपर्ने स्थानीय तह निर्वाचन ऐनको प्रावधान ‘अन्यायपूर्ण’ रहेको भन्दै साना दलले विरोध गरेपछि आयोगले पुरानै चिह्न दिन छलफल शुरु भएको हो।

केही साना दलले चुनाव चिन्ह नपाए निर्वाचन हुन नदिने चेतावनी दिन थालेपछि यसबारे छलफल गर्न आयोगलाई दबाब छ। पार्टीकै चिह्न प्रदान गर्ने आश्वासन पाएको साना दलहरूले बताएका छन्।
स्थानीय तह निर्वाचन ऐनको दफा २६ (६) अनुसार एमाले, कांग्रेस, माओवादी, जनता समाजवादी पार्टी, एकीकृत समाजवादी र लोकतान्त्रिक समाजवादी पार्टीले मात्रै आफ्नो चिह्नबाट निर्वाचनमा सहभागी हुन पाउँछन्।
यसअघि आयोगले ०७४ को स्थानीय निर्वाचनमा साना दललाई एकपटक भन्दै पार्टीकै चिह्न प्रदान गरेको थियो। यसअघि लिएकै चिह्नबाट निर्वाचनमा भाग लिन पाउनुपर्ने माग साना दलले राखेका छन्। आयोग पदाधिकारीसँग ठूला दलसहित शुक्रबार बसेको बैठकमा स्वतन्त्र रूपमा निर्वाचन लड्नुपर्ने प्रावधानको साना दलले विरोध जनाउँदै आएका छन्।
आयोग पदाधिकारीले सोमबार पनि स्थानीय, प्रदेश र संघमा प्रतिनिधित्व गर्ने ११ साना दलका प्रतिनिधिसँग अनौपचारिक छलफल गरेका थिए। ७३ दलको माग सुनुवाइ गर्न आयोग सकारात्मक पाइएको नेपाल मजदुर किसान पार्टीका नेता प्रेम सुवालले बताएका छन्।