रोजगारीका लागि इजरायल पुगेका नेपाली श्रमिकलाई दूतावासको स्वागत

रोजगारीका लागि इजरायल पुगेका नेपाली श्रमिकलाई तेलअभिवस्थित नेपाली दूतावासले स्वागत गरेको छ। नेपाली श्रमिकलाई इजरायलको स्वास्थ्य मन्त्रलाय, जनसङ्ख्या तथा अध्यागमन प्राधिकरण (पीआईबीए) र दूतावासको टोलीले वेन गुरिओन अन्तर्राष्ट्रिय विमानस्थलमा स्वागत गरेको थियो।

दूतावासका तृतीय सचिव प्रदीपसागर गिरी नेपाली श्रमिकको स्वागतका लागि विमानस्थल पुगेका थिए। इजरायलको नर्सिङ क्षेत्रमा सहायक कामदारका रूपमा पहिलो चरणमा ९९ नेपाली श्रमिक बुधबार साँझ त्यसतर्फ प्रस्थान गरेका थिए। उनीहरूलाई त्रिभुवन अन्तर्राष्ट्रिय विमानस्थलमा श्रम, रोजगार तथा सामाजिक सुरक्षामन्त्री कृष्ण्कुमार श्रेष्ठ, नेपालका लागि इजरायली राजदूत होनान गोदारलगायत मन्त्रालयका उच्चअधिकारीले बिदाइ गरेका थिए।

एक दशक लामो प्रयासपछि पुनः नेपाली श्रमिक रोजगारीका लागि इजरायल पुगेका हुन्। केही वर्षअघिसम्म निजी क्षेत्रमार्फत रोजगारीका लागि नेपालीहरू इजरायल पुग्ने गरेकामा उक्त प्रक्रिया रोकिएपछि सरकारीस्तर ९जिटुजी० बाट नेपाली श्रमिक लैजाने सरकारको प्रयासले सार्थकता पाएको हो।

नेपाली श्रमिकलाई इजरायली श्रम बजारमा सरकारीस्तरबाट प्रवेश दिलाउन त्यहाँस्थित नेपाली दूतावासले निकै ठूलो पहलकदमी लिएको थियो। दूतावासको निरन्तरको प्रयासपछि गत वर्ष नेपाल र इजरायलबीच ‘इजरायलको विशिष्ट श्रम बजारमा नेपाली कामदारको अस्थायी रोजगारीसम्बन्धी सम्झौता’मा हस्ताक्षर भएको थियो।

इजरायलको नर्सिङ क्षेत्रमा नेपालबाट सहायक कामदार ल्याउनेसम्बन्धी ‘प्रोटोकल’ मा हस्ताक्षर भएपछि पहिलो चरणमा छनोट गरिएका एक हजार बढी नेपाली रोजगारीका लागि इजरायल जाने क्रम शुरु भएको मन्त्रालयले जनाएको छ। तीमध्ये ६३ महिला र ३६ पुरुष गरी ९९ नेपाली श्रमिक बुधबार राति इजरायल प्रस्थान गरेका हुन्।

वैदेशिक रोजगार विभागले गत कात्तिकमा ५०० र मङ्सिरमा ६७५ श्रमिकको नामावली रोजगार सम्झौताका लागि इजरायल पठाएको थियो। छनोटमा परेका एक हजार १७५ मध्ये ८२१ महिला र ३५४ पुरुषको अन्तिम नामावली प्रकाशित भएको छ। नेपाल सरकार र इजरायल सरकारबीच २०७७ असोज १४ गते श्रम सम्झौता भएको थियो।

छनोटका क्रममा रहेका अन्य नेपाली श्रमिकको करार सम्झौतामा हस्ताक्षर, कोरोनाविरुद्धको खोप लगाउने, प्रवेशाज्ञा र पूर्वप्रस्थान अभिमुखीकरणको काम भइरहेको श्रम मन्त्रालयले जनाएको छ। दोस्रो चरणमा यही माघको तेस्रो साता केही नेपाली श्रमिक इजरायल जानेछन्। छनोट भएका अन्य नेपाली श्रमिक क्रमिकरूपमा त्यसतर्फ प्रस्थान गर्नेछन्।

नेपाली श्रमिकले इजरायलमा मासिक करिब रु दुई लाख पारिश्रमिक पाउनेछन्। उनीहरूले इजरायली श्रमिकसरहको पारिश्रमिक, बिदा र स्वास्थ्योपचार सुविधा प्राप्त गर्ने काठमाडौँस्थित इजरायली दूतावासले जनाएको छ।