विशेष अदालतले थुनुवा मुद्दा मात्रै हेर्ने, त्यो पनि भर्चुअल माध्यमबाट

काठमाडौं। विशेष अदालतले भोलि (बिहीबार) देखि दुई हप्ताका लागि थुनुवाका मुद्दाको सुनुवाइ गर्ने भएको छ।

कोरोना भाइरसको नयाँ भेरियन्ट ओमिक्रोनको फैलावट रोक्नको लागि विशेष अदालतको आज ५ माघमा बसेको पूर्ण बैठकले थुनुवा मुद्दा मात्रै हेर्ने निर्णय गरेको हो। अदालतका उप-रजिष्टार एवं सूचना अधिकारी नारद प्रसाद भट्टराईअनुसार ती मुद्दा पनि भर्चुअल माध्यमबाट मात्रै हेरिनेछन्।

अदालतको बैठकले ६ माघदेखि १८ माघसम्म आरोपपत्र/अभियोगपत्र दर्ता गर्ने र त्यस्ता पत्रसहित उपस्थित गराइएका अभियुक्तको थुनछेक र म्याद थप पनि भर्चुअल माध्यमबाटै गर्ने निर्णय गरेको हो।

अदालतबाट प्रवाह हुने अत्यावश्यक थुनुवाबाहेकका मुद्दा, बकपत्र, हाजिरी, वारेस अनुमति निवेदन पेशी, धरौटी फिर्ता, रोक्का फुकुवासम्बन्धी सेवा, फैसला/आदेश/कागजात प्रमाणित प्रतिलिपिसम्बन्धी सेवा स्थगित गरिएको अदालतले जनाएको छ।