मुम्बईमा कोरोना सङ्क्रमित बढ्दै, ३१ जनवरीसम्म विद्यालय बन्द

काठमाडौं। भारतको महाराष्ट्रमा कोरोना सङ्क्रमित बढेको छ। सबैभन्दा धरै राजधानी मुम्बईमा सङ्क्रमितको सङ्ख्या बढेको हो। आइतबार मुम्बईमा ८ हजारभन्दा बढी कोरोना सङ्क्रमित थपिएका छन्। उही समयमा ओमिक्रोन भेरियन्टका ३०० भन्दा बढी सङ्क्रमित थपिएका छन्।

कोरोना सङ्क्रमितहरू बढ्दै गएसँगै मुम्बईमा कक्षा १ देखि ९ र कक्षा ११ का लागि ३१ जनवरीसम्म विद्यालय बन्द गरिएको छ। तर, उनीहरूको अनलाइन कक्षा भने जारी रहनेछ।

बृहन्मुम्बई नगर निगमले कक्षा १० र १२ का विद्यार्थीका लागि विद्यालय बन्द नगरिने जनाएको छ। उनीहरु विद्यालय जान र कक्षा लिन सक्छन्।

यसैबिच, १५ देखि १८ वर्ष उमेर समूहका बालबालिकाहरूका लागि कोभिड–१९ खोप मुम्बईका नौ समर्पित केन्द्रहरूमा राष्ट्रिय अभियानसँगै शुुरु गरिएको छ। आज, मुम्बईमा ८ हजार ८२ जनामा सङ्क्रमित देखिएका छन्। ६ सय ६२ जना निको भएका छन्। २१ जनाको मृत्यु भएको छ।