राष्ट्रियसभा सदस्य निर्वाचनका लागि निर्वाचन अधिकृत नियुक्त

काठमाडौं। निर्वाचन आयोगले राष्ट्रियसभा सदस्यको आगामी १२ माघमा हुने निर्वाचनका लागि सम्बन्धित जिल्ला न्यायाधीशलाई नियुक्त गर्ने निर्णय गरेको छ। नवनियुक्त निर्वाचन अधिकृतहरुले १२ पुसदेखि कार्यभार सम्हाल्नेछन्।

निर्वाचन अधिकृतमा प्रदेश नं १ का लागि मोरङ जिल्ला अदालतका न्यायाधीश भरत लम्साल, प्रदेश नं २ का लागि धनुषा जिल्ला अदालतका न्यायाधीश ब्रजेश प्याकुरेल, बागमती प्रदेशका लागि मकवानपुर जिल्ला अदालतका न्यायाधीश डिल्लीरत्न श्रेष्ठ छन्।

त्यसैगरी, गण्डकी प्रदेशका लागि कास्की जिल्ला अदालतका न्यायाधीश श्री श्रीकृष्ण भटृराई, लुम्बिनी प्रदेशका लागि दाङ जिल्ला अदालतका न्यायाधीश रीतेन्द्र थापा, कर्णाली प्रदेशका लागि सुर्खेत जिल्ला अदालतका न्यायाधीश डा राजेन्द्रकुमार आचार्य र सुदूरपश्चिम प्रदेशका लागि कैलाली जिल्ला अदालतका न्यायाधीश जयानन्द पनेरु रहेको निर्वाचन आयोगका प्रवक्ता शालीग्राम शर्माले जानकारी दिए।