बैठकको निर्णय सबैले स्वीकार्नु पर्छ : अध्यक्ष ओली

काठमाडौं। नेकपा (एमाले) अध्यक्ष केपी शर्मा ओलीले केन्द्रीय कमिटी बैठकले उत्कृष्ट प्रक्रियाबाट नेतृत्व चयन गरेको भन्दै बैठकको निर्णयलाई सबैले स्वीकार्नुपर्ने बताएका छन्।

भक्तपुरको जर्मन होम हस्पिटालिटीमा जारी केन्द्रीय कमिटीको दोस्रो दिनको बैठकलाई सम्बोधन गर्दैै उनले पार्टी एकतालाई मूल मन्त्र मानेर अगाडि बढ्नुपर्नेमा जोड दिए। भने, “हाम्रो बीचको एकताले मात्र सबै कुरा जित्न सकिन्छ, एकताको मन्त्रमा ध्यान दिएर अगाडि बढ्नुपर्छ कसैलाई जिम्मेवारी पुगेन भनेपछि उचित जिम्मेवारी दिनेछौँ।”

केन्द्रीय कमिटी नेतृत्व व्यवस्थापन र जिम्मेवारी दिने कुरा सरल होइन गाह्रो कुरा हो भन्दै उनले केन्द्रीय कमिटीका लागि मात्रै आफूलाई ९०० जनाको नाम आएको बताए। पोलिटब्यूरोका लागि पनि ५० प्रतिशतभन्दा बढी योग्य व्यक्ति हुँदाहुँदै पनि उत्कृष्टमध्ये उत्कृष्ट छान्न गाह्रो भएको बताए।

लोकतान्त्रिक विधिमा निर्वाचन पद्धतिले नै सबै ठिक गर्नेभन्दा पनि नेतृत्वसँग देशभरिलाई हेर्ने र बुझ्ने क्षमता हुने भएकाले नेतृत्वले तयारी गरेर ल्याएर गरिएको निर्णय सबैभन्दा बढी विश्वासिलो र लोकतान्त्रिक हुने बताए।

उनले बैठकको निर्णयलाई सबैले स्वीकार्नुपर्नेमा जोड दिँदै कतिपयलाई अन्याय परेको तर योभन्दा राम्रो प्रस्ताव अरू हुन नसक्ने बताएका केन्द्रीय सदस्य महेश बस्नेतले जानकारी दिए।

बैठकले आज केन्द्रीय कमिटीदेखि स्थायी कमिटी र पोलिटब्यूरोसम्म गठन गरेको छ।