महाधिवेशनपछि पहिलो पत्रकार सम्मेलन गर्दै एमाले अध्यक्ष ओली

काठमाडौं। एमाले अध्यक्ष तथा पूर्वप्रधानमन्त्री केपी शर्मा ओलीले आज पत्रकार सम्मेलन गर्दैछन्। दशौँ महाधिवेशनबाट अध्यक्ष निर्वाचित भएपछि ओलीले पहिलोपटक पत्रकार सम्मेलन राखेका हुन्।

तीनकुनेस्थित रोयल बैंक्वेटमा मध्यान्ह साढे १२ बजे ओलीले पत्रकारसँग अन्तरक्रिया गर्नेछन्। प्रेस चौतारी नेपालले महाधिवेशनको सन्देशसहित अध्यक्ष ओलीसँग साक्षात्कार कार्यक्रम आयोजना गरेको हो ।

पत्रकार सम्मेलनमा अध्यक्ष ओलीले समसामायिक राजनीतिक परिस्थिति, आगामी रणनीति तथा पार्टी अभियानबारे जानकारी गराउने बताइएको छ।

चितवनको सौराहामा १० मंसीरमा शुरु भएको दशौँ महाधिवेशनले ओलीलाई दोस्रो कार्यकालका लागि अध्यक्षमा निर्वाचित गरेको थियो ।

एमालेले यही २५ र २६ मंसीरमा केन्द्रीय कमिटीको बैठक बोलाएको छ। उक्त बैठकमा १५ वटा कार्यसूचीमाथि छलफल हुने बताइएको छ।