सल्यानमा जीप दुर्घटना, १२ जना घाइते

नेपालभ्युज

सल्यान। सल्यानको बिसौनामा जीप दुर्घटना हुँदा १२ जना घाइते भएका छन्। क्षमताभन्दा बढी यात्रु हालेका कारण उकालो चढ्न नसक्दा जिप सडकमै पल्टिएको हो। सल्यानको छत्रेश्वरी गाउँपालिका ६ लान्तीबाट रानागाउँ जाँदै गरेको रा १ ज ५२८ नम्बरको जिप सोमबार बेलुकी बिसौना भन्ने ठाउँ नजिकै दुर्घटना भएको हो।

दुर्घटनामा त्रिवेणी गाउँपालिका २ का सुकलाल थापा, रेवती थापा, कमला बुढाथोकी, धनसिंह चलाउने, दली खड्का, मदन महतरा, छत्रेस्वरी गाउँपालिका ६ का पार्वती शाही घाइते भएका जिल्ला प्रहरी कार्यालय सल्यानले जनाएको छ। यस्तै विजयनाथ योगी, धनबहादुर राना, उपेन्द्र शाही, दीपक भारती र सरिता घर्ती घाइते भएका छन्।

घाइते भएका सबैको श्रीनगरस्थित कान्तिपुर सामुदायिक अस्पतालमा उपचार भइरहेको जिल्ला प्रहरी कार्यालय सल्यानका सूचना अधिकारी तथा प्रहरी प्रवक्ता अर्जुन पौडेलले बताए।