ओली ज्ञानेन्द्रसँग मिलेर व्यवस्था उल्टाउने खेलमा छन् : प्रचण्ड

काठमाडौं। सत्तारुढ दल नेकपा माओवादी केन्द्रका अध्यक्ष पुष्पकमल दाहाल प्रचण्डले अहिले व्यवस्था उल्टाउने खेल भइरहेको बताएका छन्। उनले राजावादीहरु र परिवर्तन विरोधीहरुबीच साँठगाँठ बढेको तथा व्यवस्था परिवर्तनको खेल भइरहेको बताएका छन्।

माओवादी केन्द्रले कीर्तिपुरमा आयोजना गरेको चियापान तथा शुभकामना आदानप्रदान कार्यक्रममा बोल्दै प्रचण्डले अहिले व्यवस्था उल्टाउने खेलमा प्रमुख प्रतिपक्षी दल नेकपा एमालेका अध्यक्ष केपी शर्मा ओली नै सक्रिय भएको आरोप लगाएका छन्।

ओलीले राजावादीहरुसँग मिलेर व्यवस्था उल्टाउने खेलमा लागेको प्रचण्डले आरोप लगाएका हुन्। उनले भने, ‘‘मैले सूचना पाएको छु, ओलीले राजावादीहरुसँग भेटेर व्यवस्था उल्टाउने छलफल गरेछन्।”

पार्टी कार्यकर्तालाई ब्रिफिङ गर्ने क्रममा प्रचण्डले ओलीलाई गणतन्त्र र संघीयता कहिल्यै मन नपरेको भन्दै ओली व्यवस्था उल्टाउने खेलमा रहेको बताएका हुन्। उनले ओलीलाई संघीय लोकतान्त्रिक गणतन्त्र तथा समावेशी समानुपातिक भनेर दलित, महिलालाई कोटा छुट्याएको पनि मन नपरेको ठोकुवा गरे।

‘‘ओलीले त प्रतिक्रियावादीहरुलाई मलजल गरे। उनका ती गतिविधिविरुद्ध हामीले संघर्ष गर्यौँ”, प्रचण्डले भने, ‘‘नेकपामा हामीहरुले हारेका होइनौँ, जितेका हौँ। त्यहाँ ओलीको जम्मा २५ प्रतिशत थियो, हामीसँग ७५ प्रतिशत थियो।”

प्रचण्डले आफूले पाएको सूचनाअनुसार ओलीले ज्ञानेन्द्रको मान्छेलाई भेटेर आफूलाई संघीयता र गणतन्त्र कहिल्यै मन नपरेको तर बाध्य भएर मानेको बताएका दाबी गरे। उनले ओलीले मौका पाएको अवस्थामा व्यवस्था उल्टाउने गरी अगाडि बढ्ने पनि दाबी गरे।