नेपाल आइपुगे स्पेनका सभामुख डेल्गाडो

काठमाडौं। स्पेनका सभामुख ब्लान्का मार्टिन डेल्गाडो आफ्नो प्रतिनिधिमण्डलसहित नेपाल आइपुगेका छन्। बागमती प्रदेशका सभामुख सानुकुमार श्रेष्ठको निमन्त्रणामा डेल्गाडो २४ सदस्यीय प्रतिनिधिमण्डलको नेतृत्व गर्दै आज (बिहीबार) काठमाडौँ आइपुगेको हो।

त्रिभुवन अन्तर्राष्ट्रिय विमानस्थलमा सभामुख श्रेष्ठलगायत प्रदेशसभा सचिव, परराष्ट्र मन्त्रालयका उच्च अधिकारीले स्वागत गरेका छन्। प्रतिनिधिमण्डलमा स्पेनका प्रदेशमन्त्री, मेयर, व्यापारीहरु सहभागी छन्।

६ दिनको भ्रमणमा आएको स्पेनी प्रतिनिधिमण्डलले नेपालमा रहँदा विभिन्न विशिष्ट व्यक्तित्वहरुसँग भेटवार्ता गर्नुका साथै विभिन्न धार्मिकस्थलको अवलोकन भ्रमण गर्ने कार्यक्रम रहेको छ।

स्पेनी प्रतिनिधिमण्डलले पाटन दरबार क्षेत्र, भक्तपुर दरबार क्षेत्र, स्वयम्भूनाथको अवलोकन भ्रमण गर्नुुका साथै लुम्बिनीमा आयोजित कार्यक्रममा सहभागी हुने र बौद्धनाथमा भिक्षुहरुसहित दीपप्रज्वलन गर्ने कार्यक्रम रहेको छ।

भ्रमण टोली नेपालमा रहँदा राष्ट्रियसभाका अध्यक्ष गणेशप्रसाद तिमिल्सिना, पूर्वप्रधानमन्त्री एवं नेकपा एमाले अध्यक्ष केपी शर्मा ओली र अर्का पूर्वप्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’सँग भेटवार्ता गर्नेछ।

यस्तै, परराष्ट्रमन्त्री डा. नारायण खड्का र शिक्षामन्त्री देवेन्द्र पौडेलसँग भेटवार्ता गर्ने कार्यक्रम रहेको बताइएको छ। स्पेनी प्रतिनिधिमण्डल यही कात्तिक १६ गते स्पेन प्रस्थान गर्ने छ।