बाढीमा फसेका ५ जनाको २२ घण्टापछि सेनाद्वारा उद्धार

बाढीमा फसेका ५ जनाको २२ घण्टापछि सेनाद्वारा उद्धार
फाइल फोटो

महेन्द्रनगर। नेपाली सेनाले कञ्चनपुरको भीमदत्तनगरपालिका–९ मसेट्टीका दुई बालबालिकासहित पाँच जनाको महाकाली नदीबाट २२ घण्टापछि सकुशल उद्धार गरेको छ।

लगातारको वर्षापछि महाकाली नदीमा आएको बाढीले मसेट्टीका लक्ष्मण नायक उहाँकी श्रीमती शान्ति, दुई छोरा र स्थानीय दीर्घमती देवी खड्कालाई हेलिकप्टरमार्फत उद्धार गरेको हो। सोमबार साँझदेखि महाकाली बस्तीमा उर्लिएपछि कुखुरा र गाउँ गोठको रेखदेख गर्न गएका उनीहरु बाढी आएपछि त्यही फसेका हुन्। मङ्गलबार बिहानैबाट सेनाको टोली उद्धारका लागि त्यहाँ जान खोजे पनि प्रतिकूल मौसमका कारण उद्धारस्थल पुग्न सकेको थिएन।

“स्थल मार्गबाट जान अन्य खहरे खोला र बाढीले जान सक्ने अवस्था नै थिएन”, श्रीदल गुल्मका गुल्मपति सेनानी भीष्म केसीले भने, “स्थल मार्गबाट गएर त्यहाँ उद्धार सम्भव नभएपछि सुर्खेतबाट हेलिकप्टर बोलाइएको हो।”

मङ्गलबार दिउँसो त्यहाँस्थित श्री नं २५ बाहिनी अड्डा पुगेको हेलिकप्टरले मसेट्टी पुगेर तीन चरणमा फसेकाको उद्धार गर्दै गाउँको जिम्मा लगाएर फर्किएको छ। “फसेका स्थानीयलाई उद्धार गर्न चारैतिर रुख हुँदा केही कठिनाइ भए पनि सकुशल उद्धार गर्न सक्यौँ”, उद्धारको नेतृत्व गरेका पाइलट प्रमुख सेनानी रचन श्रेष्ठले भने “उद्धारमा हाम्रो तालीम प्राप्त टिम पनि सक्रिय रह्यो।”

‘धन्य सेना आएर बचाए’

सेनाले डोरीको सहायताबाट उद्धार गरेपछि खुसीले भक्कानिँदै स्थानीय शान्ति नायकले आफूहरूले दोस्रो जीवन पाएको बताए।
“रातभरि बगेर आएको रुखको सहरामा बस्यौँ”, उनले भने “बाँचिएला भन्ने आश मरिसकेको थियो।” उहाँले आफ्नो परिवार लामो समयदेखि कुखुरापालन र कृषि कार्य गर्दै आएको बताए।

करिब ४५ देखि ५० परिवार रहेको मसेट्टीमा बाढीको त्रासदीपछि सोमबार राति कसैको पनि घरमा चुल्हो नबलेको स्थानीय हरिस साउदले बताए। उनले बाढीले एक दर्जन घरसमेत महाकालीले बगाएको बताए। स्थानीयले राति नायक परिवार थुनिएको थाहापाएलगत्तै स्थानीय प्रशासनमा खबर गरेको साउदको भनाइ थियो। “ आज दिउँसो पछि त टेलिफोन र बिजुलीसितको पनि सम्बन्ध विच्छेद हुँदा झन् तनाव भयो ” स्थानीय गोमती धामीले भनिन्, “हेलिकप्टर आएको देखेपछि खुसीको सीमा रहेन।” उनले गाउँलेको जीवन बचाउन सहयोग गरेकोप्रति सेनाको टोलीलाई धन्यवाद दिइन्।

सेनाले मसेट्टीको साँघुरो खेतमा हेलिकप्टर ल्यान्ड गरेर उद्धार थालेको थियो। पहिलो चरणमा सेनाले उद्धार गरेकी दीर्घमती देवी खड्काले सेना उद्धारका लागि आएको देख्दा भगवान् आएको अनुभूति भएको बताइन्।

“रातभर भगवान्को नाम जपेर बस्यौँ”, उनले भनिन् “जिन्दगी यत्ति हो भन्ने लागेको थियो, धन्य सेना आएर बचाए।” उनले आफूहरू महाकालीमा थुनिएको पीडा शब्दले व्यक्त गर्न नसक्ने बताइन्। महाकाली नदीमा दशकौँयता सबैभन्दा ठुलो बाढी आएको थियो। मंगलबार दिउँसो नदीमा पाँच लाख ४७ हजार क्युसेक पानी मापन गरिएको थियो। अहिले पानी घट्ने क्रममा छ। महाकालीमा आएको बाढीका कारण तटीय क्षेत्रमा डुबान पर्नुका साथै जोखिम बढेको छ।

Leave a Reply

Your email address will not be published.

सम्बन्धित

ट्रेन्डिङ

Copyright © 2022 Digital House Nepal Pvt. Ltd. - All rights reserved