मृत्यु भएकाको नाममा भत्ता लिने गाविस सचिवसहित पाँच जनाविरुद्ध मुद्दा

उदयपुर। मृत्यु भइसकेका व्यक्तिको नाममा सामाजिक सुरक्षा लिएको अभियोगमा अख्तयार दुरुपयोग अनुसन्धान आयोगले पाँच जनाविरुद्ध मुद्दा दर्ता गरेको छ।

उदयपुरको रामपुर ठोक्सिला गाविसका तत्कालीन सचिव केशवप्रसाद आचार्यसहित पाँचजनाविरुद्ध अख्तियारले आर्थिक अनियमितताको अभियोगमा मुद्दा दर्ता गरेको हो।

मृत्यु भइसकेका व्यक्तिको दोहोरो नाममा र बनावटी नाममा सामाजिक सुरक्षा भत्ता बापतको रकम निकासा गरी आर्थिक अनियमितता गरेको अख्तियारको ठहर छ। आचार्यसहित तत्कालीन गाविस सचिव लोकेन्द्र कार्की, विशाल सुन्दास, माधवप्रसाद खतिवडा र पुष्पराज सिग्देलविरुद्ध अख्तियारले आज विशेष अदालतमा मुद्दा दर्ता गरेको हो।

तत्कालीन गाविस सचिवहरूले मृत्यु दर्तापश्चात् मृतकको सामाजिक सुरक्षा भत्ता वितरणको भर्पाइमा कैफियत जनाई लगत कट्टा गर्नुपर्नेमा मृतकका नाममा साथै दोहोरो नामको भर्पाइ बनाएर भ्रष्टाचार गरेको भन्दै अख्तियारमा उजुरी परेको थियो।

उजुरीपछि छानबिन गर्दा १६ लाख ४० हजार ५०० हिनामिना गरेको खुल्न आएको आयोगका प्रवक्ता नारायणप्रसाद रिसालले बताए। रिसालका अनुसार उक्त गाविसमा सात–आठ वर्षअघि नै मृत्यु भइसकेकाको व्यक्तिका नाममा आर्थिक वर्ष ०६३/६४ सालदेखि ०७१/७२ सालसम्म बनावटी नाममा सामाजिक सुरक्षा भत्ताबापत रकम निकासा गरी अनियमितता गरेको देखिएको छ।

अख्तियारले तत्कालीन गाविस सचिव केशवप्रसाद आचार्यसँग नौ लाख ९० हाजार ५००, लोकेन्द्र कार्कीसँग ७८ हाजार, विशाल सुन्दाससँग ८२ हजार, माधवप्रसाद खतिवडासँग तीन लाख १४ हजार र पुष्पराज सिग्देलसँग एक लाख ७६ हजार रुपैयाँ सजाय मागदाबीसहित अख्तियार दुरुपयोग अनुसन्धान आयोग ऐन २०४८ को दफा १८ एवं दफा ३५ बमोजिम अदालतमा आरोपपत्र दायर गरेको हो।

तत्कालीन गाविस आचार्य हाल मालपोत कार्यालय उदयपुरमा, लोकेन्द्र कार्की रौतामाई गाउँपालिका-७ को वडासचिव पदमा, विशाल सुन्दास तथ्यांक कार्यालय उदयपुरमा, माधवप्रसाद खतिवडा रौतामाई गाउँपालिकामा शाखा अधिकृतका रूपमा कार्यरत छन् भने पुष्पराज सिग्देलले भने सेवाबाट अवकाश पाइसकेका छन्।