आफन्त नेपालले गर्‍याे भारतमा बेचिन लागेका ७६२ जनाको उद्धार

काठमाडौं। मानव बेचबिखन र लैंगिक हिंसाविरुद्ध कार्यरत आफन्त नेपालले पछिल्लो एक वर्षमा नेपाल भारत नाकाबाट ६८० जना र भारतबाट ८२ जना महिला तथा बालबालिकाको उद्धार गरेको छ। बेचिन लागेका उनीहरुको आफन्त नेपालले उद्धार गरेको हो।

संस्थाको सामाजिक लेखापरीक्षण र १५ औँ वार्षिक साधारणसभाका क्रममा निर्देशक इन्द्रराज भट्टराईले संस्थाले गत आर्थिक वर्षमा ४८१ जनालाई आकस्मिक आवास, ११९ जनालाई सुरक्षित आवास सेवा र ३६ जना प्रभावितलाई कानुनी सहायता दिएको बताए ।

संस्थाले सहजीकरण गरेका मानव बेचबिखन विरुद्धका मुद्दामा संलग्न ३८ प्रतिवादिमध्ये ३० जना प्रक्राउ गरेका भट्टराईले बताए । संस्थाले विभिन्न जिल्लाका समुदायस्तरमा ११० महिला समूह, १३ किशोरी समूह र ११ जिम्मेवार पुरुष समूह निर्माण तथा परिचालन गरेको छ।

ती समूहमार्फत मानब बेचबिखन, लैंगिक हिंसा र बालविवाहविरुद्ध तथा सुरक्षित आप्रवासनबारे अभिमुखीकरण कार्यक्रम सञ्चालन गर्ने गरिएको संस्थाका कार्यक्रम निर्देशक करुणा खत्रीले बताइन्।

उनका अनुसार ‘जसको सवाल, उसैको सहभागिता र उसैको नेतृत्व’ भन्ने संस्थाको अभियानअन्तर्गत अहिले संस्थामा थुप्रै प्रभावितहरु परामर्शकर्ता तथा सामुदायिक परिचालकको रुपमा कार्यरत रहेका छन्।