महिला अभियन्ता कमला भासिनको निधन

एजेन्सी। भारतकी महिलावादी आन्दोलनकी अभियन्ता एवं कवि कमला भासिनको निधन भएको छ।

स्थानिय समयअनुसार शनिबार बिहान ३ बजे भासिनको निधन भएको हो। उनी केही महीनाअघि देखि क्यान्सर रोगसँग जुध्दै आएकी थिइन्।

भासिन महिला अधिकारको क्षेत्रमा सन् १९७० देखि निरन्तर काम गर्दै आएकी व्यक्ति हुन्। लैङ्गिक समानता, शिक्षा, मानव विकास लगायतका अभियानमा उनी केन्द्रित थिइन्।

सन् १९४६ मा दिल्लीमा भासिनको जन्म भएको थियो। महिला समूह–संगतबाट उनको परिचय विस्तार भएको होे।

भासिनको ‘म एक केटी हुँ, त्यसैले पढ्न चाहन्छु’ शीर्षकको कविता निकै प्रख्यात रहेको छ। उनको ‘बोर्डर एन्ड बाउन्ड्रिज्ः वुमन इन इन्डियाज् पार्टेसन’ नामको पुस्तक प्रकाशित छ।