महिला अभियन्ता कमला भासिनको निधन

भासिन महिला अधिकारको क्षेत्रमा सन् १९७० देखि निरन्तर काम गर्दै आएकी व्यक्ति हुन्। लैङ्गिक समानता, शिक्षा, मानव विकास लगायतका अभियानमा उनी केन्द्रित थिइन्।

नेपालभ्युज

एजेन्सी। भारतकी महिलावादी आन्दोलनकी अभियन्ता एवं कवि कमला भासिनको निधन भएको छ।

स्थानिय समयअनुसार शनिबार बिहान ३ बजे भासिनको निधन भएको हो। उनी केही महीनाअघि देखि क्यान्सर रोगसँग जुध्दै आएकी थिइन्।

सन् १९४६ मा दिल्लीमा भासिनको जन्म भएको थियो। महिला समूह–संगतबाट उनको परिचय विस्तार भएको होे।

भासिनको ‘म एक केटी हुँ, त्यसैले पढ्न चाहन्छु’ शीर्षकको कविता निकै प्रख्यात रहेको छ। उनको ‘बोर्डर एन्ड बाउन्ड्रिज्ः वुमन इन इन्डियाज् पार्टेसन’ नामको पुस्तक प्रकाशित छ।

सामाजिक विज्ञानमा तालिम प्राप्त उनले लैङ्गिक, महिला विकास, शिक्षा र सञ्चारका क्षेत्रमा करीब ३५ वर्ष काम गरेकी थिइन्। उनले ग्रामीण भेगका मानिसलाई सशक्तिकरण गर्न सन् १९७२ मा राजस्थानको एक स्वयंमसेवी संस्थाबाट काम शुरु गरेकी थिइन्।

यस्तै सन् १९७६ देखि २००१ सम्म संयुक्त राष्ट्रसंघ अन्तर्गतको खाद्य तथा कृषि संस्था (एफएओ) मा समेत आबद्ध रहेकी थिइन्। एफएओबाट सन् २००२ मा राजीनामा दिँदै उनी महिला समूह संगतमा आवद्ध रहिन्। उनी त्यस संस्थाको संस्थापक सदस्य हुनुका साथै सल्लकार समेत थिइन्।