शिशिर र कोमलको आवाजमा नयाँ गीत ‘जननेता मदन भण्डारी’ सार्वजनिक

काठमाडौं। स्व जननेता मदन भण्डारीको जीवनीमा रहेर तयार पारिएको नयाँ म्युजिक भिडिओ ‘जननेता मदन भण्डारी’ सार्वजनिक गरिएको छ। आइतबार राष्ट्रिय नाचघर जमलमा एक कार्यक्रमको आयोजना गर्दै उक्त गीत सार्वजनिक गरिएको हो।

गीतमा स्व भण्डारीको राजनीतिक जीवन र उनको विचारधारालाई समेट्ने प्रयास गरिएको छ। गीतमा गायक शिशिर योगी र गायिका कोमल वलीको स्वर, बुद्धिमान परियारको शब्द तथा शिव गौतमको संगीत सुन्न सकिन्छ। सार्वजनिक गीतको भिडियोमा कलाकार सुमन कार्कीले स्व। भण्डारीको अभिनय गरेका छन् भने कलाकार सारिका प्रसाईँले विद्यादेवी भण्डारीको भूमिका निर्वाह गरेकी छिन्।

भिडिओमा विशेष गरेर भण्डारीको जन्म गाउँ ताप्लेजुङको मैवाखोला गाउँपालिका, ढुंगेसाँघुस्थित रहेको उनको जन्मघर र पछि बसाइँ सरी आएको मोरङको उर्लाबारीलगायतका स्थानका स्थान समेटिएको छ। गीतको भिडिओमा एमाले वरिष्ठ उपाध्यक्ष ईश्वर पोखरेल, महासचिव शंकर पोखरेल, सचिव योगेश भट्टराई, स्थायी कमिटी सदस्यहरू देवराज घिमिरे, गुरु बराल, मैवाखोला गाउँपालिकाका पूर्व पालिका अध्यक्ष राजन थत्लुङको शुभकामना सन्देशसमेत समेटिएको छ।

डिलाइट क्रिएशन कम्पनीमार्फत संचालिन ‘नेपाल विशेष’को अफिसियल यू–ट्युब च्यानलमार्फत सार्वजनिक गीतको भिडियोलाई दिपेन बस्न्यात र रेहम दर्लामी मगरले छायाङ्कन गरेका हुन्। भिडिओलाई दिपेन बस्न्यात स्वंयको सम्पादन रहेको छ। गीत सार्वजनिक कार्यक्रममा नेकपा एमालेका सचिव योगेश भट्टराई, नेत्री उर्मिला थेवे, गायक शिशिर योगीलगायतको उपस्थिति थियो।