अर्मेनिया र अजरबैजानका सेनाबीच भीषण लडाइँ, १ सय सैनिक मारिए

लण्डन। अर्मेनिया र अजरबैजानका सेनाबीच भीषण लडाइँ हुँदा कम्तिमा पनि एक सय जना सैनिकको ज्यान गएको छ।

अर्मेनिया र अजरबैजानको विवादित नागोर्नो-काराबाख क्षेत्रमा २०२० पछिको सबैभन्दा खराब लडाईमा मंगलबार करिब सय जना सैनिकको मृत्यु भएको बीबीसीले  जनाएको छ ।

भीडन्तबारे दुवै देशले एक अर्कालाई दोष लगाएका छन् । अजरबैजानको रक्षा मन्त्रालयले अर्मेनियाको उत्तेजनाका कारण आफ्ना ५० जना सैनिकको मृत्यु भएको भनेको छ ।  जबकि अर्मेनियाले यसअघि आफ्ना कम्तीमा ४९ सैनिकको मृत्यु भएको रिपोर्ट गरेको थियो।

एकैदिन दुवै पक्षले ठूलो क्षति वेहोरेपछि रुसको मध्यस्ततामा युद्धविराम भएको खबरमा उल्लेख छ । तर युद्धविरामपछि पनि दुवै देशले आक्रमण जारी राखेका छन् र एक अर्कालाई आरोप लगाएका छन् ।

अजरबैजान आफ्नो भूमिमा अगाडि बढ्न खोजेको आरोप लगाउँदै आर्मेनियाले विश्वका नेताहरूलाई मद्दतको लागि अपील गरेको थियो। अमेरिकी विदेशमन्त्री एन्टोनी ब्लिन्केनले दुवै देशका नेताहरूलाई बोलाएर लडाइँ तत्काल रोक्न र शान्ति सम्झौताका लागि जोड दिएका छन् ।

यस्तै, फ्रान्सेली राष्ट्रपति इमानुएल म्याक्रोनले आफ्ना अजरबैजानका समकक्षी इल्हाम अलीयेभलाई फोन गरी युद्धविरामको सम्मानमा फर्कन आग्रह गरेका छन्।

अर्मेनियाका प्रधानमन्त्री निकोल पाशिन्यानले यसअघि म्याक्रोनसँग कुरा गरेका थिए र साथै रूसी नेता भ्लादिमिर पुटिन र ब्लिन्केनलाई फोन गरेर अजरबैजानको आक्रामक कार्यहरू को जवाफ माग गरेका थिए। अर्मेनियाको रक्षा मन्त्रालयले युद्धविराम पछि झडपहरू कम भएको तर सीमामा स्थिति अझै अत्यन्त तनावपूर्ण रहेको बताएको छ।