रुसले युरोपमा पठाउने ग्यास फेरि रोक्यो, आगामी जाडोमा संकट आउने चिन्ता

लण्डन। रुसले युरोपमा पठाउने ग्यास पुन: रोकेको छ । यसअघि पटक पटक ग्यास  निर्यात रोक्ने र कोटा अनुसार नपठाउने गरेको रुसले यसपटक तीन दिनको लागि ग्यास रोकेको बीबीसीले जनाएको छ । युरोपमा ग्यास पठाउने नर्ड स्ट्रिम वन  पाइपलाइन मर्मतका लागि तीन दिनका लागि बन्द हुने रूसी आपूर्तिकर्ता गाजप्रमले प्रष्ट पारेको छ ।

यो जर्मनीमा कम्पनीको मुख्य ग्यास पाइपलाइन हो। बढ्दो ऊर्जा लागतको प्रतिक्रियालाई समन्वय गर्न युरोपेली ऊर्जा मन्त्रीहरूले सेप्टेम्बर ९ तारिखमा आपतकालीन बैठक गर्ने तयारी गर्दा रुसले ग्यास रोकेको खबर आएको हो । समाचार एजेन्सीका रोयटर्सका अनुसार फ्रान्सले मस्कोलाई “युद्धको हतियार” को रूपमा ऊर्जा आपूर्ति प्रयोग गरेको आरोप लगाएको छ । रुसले भने प्राविधिक समस्याहरू बाहेक, आपूर्तिमा कुनै बाधा नरहेको प्रतिक्रिया दिएको छ ।

रुसले गत वर्ष आफ्नो ४० प्रतिशत प्राकृतिक ग्यास ईयूलाई आपूर्ति गरेको थियो।युरोपको सबैभन्दा ठूलो अर्थतन्त्र भएको जर्मनी रुसी ग्यासको सबैभन्दा ठूलो आयातकर्ता हो । सन् २०२१ मा  बेलायतले आफ्नो आवश्यकताको चार प्रतिशतव ग्यास रूसबाट आयात गरेकोमा यस वर्ष जुनयता  लगातार तेस्रो महिना कुनै रूसी ग्यास आयात गरेको छैन । रुसले युरोपमा ग्यास निर्यातमा कडाई गरेपछि बजार भाउ आकासिएको छ । आउँदो जाडोयामको लागि ग्यासका भण्डारण भर्न युरोपेली देशलाई मुश्किल परिरहेको छ ।

ग्यासको अभाव र महँगीका कारण बिजुलीको  भाउ पनि १० गुणाले बढेको छ ।  युरोपेली संघले रुसबाट एक वर्षभित्र दुई तिहाइ ग्यास आयात घटाउने बताए पनि पूर्ण प्रतिबन्धको अभावमा रोकिएको छ। यसको लक्ष्यमा पुग्न सदस्य राष्ट्रहरूले आगामी सात महिनामा १५ प्रतिशत ग्यासको प्रयोग कटौती गर्न सहमत भएका छन्। यद्यपि युरोपका देशले वैकल्पिक आपूर्तिहरू कहाँ फेला पार्ने भन्नेमा शंका छ ।  अमेरिका र कतार जस्ता उत्पादकहरूबाट ट्याङ्करहरूमा लिक्विफाइड प्राकृतिक ग्यास आयात गर्नुपर्ने जोखिम पनि बढेको छ ।