चिलीमा काम गर्ने समय हप्ताको ४० घण्टामा झारिदैँ, स्कटल्याण्डमा हप्तामा ३ दिन विदा !

चिली। दक्षिण अमेरिकी देश चिलीले साप्ताहिक कार्य घण्टा घटाउने तयारी गरेको । चिलीका राष्ट्रपति गेब्रियल बोरिकले अब देशको औपचारिक क्षेत्रमा काम गर्नेहरुले हप्तामा जम्मा ४० घण्टा मात्रै तोक्ने तयारी गरेका छन् । उनले आफूले चुनावमा गरेको वाचा अनुसार कार्य घण्टा घटाउने तयारी गरेका हुन्  ।

५ वर्षभित्र कामको हप्ता ४५ बाट ४० घण्टामा झार्ने लक्ष्य राखेको विधेयक सन् २०१७ मा तत्कालीन सांसद तथा वर्तमान सरकारका प्रवक्ता क्यामिला भालेजोले पेश गरेपछि कांग्रेसमा अलपत्र छ ।अहिलेको सरकारले यो कानुनलाई पुन अघि बढाउने भएको छ । देशमा कार्य घण्टा सुधार निकै जरुरी भइसकेको राष्ट्रपति बोरिकले बताएका छन् ।

विश्वको सबैभन्दा ठूलो तामा उत्पादक देश चिलीको अर्थतन्त्र सुस्त रहेको र महामारीपछि तीव्र मूल्यवृद्धिको दबाबको सामना गरिरहेको बेला वामपन्थी सरकारले साना, मझौला र ठूला कम्पनीका प्रतिनिधिहरू र श्रमिक महासंघहरूसँग वार्तालापलाई बढावा दिएको छ।  बोरिकले सरकारले विधेयकलाई दुबै विधायिका सदनबाट चाँडो भन्दा चाँडो मतदान र अनुमोदन गर्ने अपेक्षा गरेको बताएका छन् ।धेरै रिपोर्टहरूले सुझाव दिएका छन् कि कम साप्ताहिक घण्टा काम गर्नुको सबैभन्दा ठूलो फाइदा भनेको यसले मानिसहरूलाई राम्रो कामदार बनाउँछ।

अनुसन्धानले मानिसहरूले थोरै घण्टा काम गर्दा धेरै काम गर्ने र उनीहरूले धेरै घण्टा काम गर्दा कम गर्ने देखाएको छ ।  ३८ सदस्य राष्ट्रहरुको अन्तरसरकारी आर्थिक संगठन अर्गनाइजेसन फर इकोनोमिक कोअपरेसन एण्ड डेभलपमेन्ट (ओईसीडी) का अनुसार धेरै देशले काम र जीवनबीच सन्तुलन कायम राख्न कम घण्टा काम रोजेका छन् । ओईसीडीका अनुसार, सबैभन्दा छोटो काम गर्ने हप्ता भएको देश नेदरल्याण्ड हो, जहाँ हप्तामा २९ दशमलव ५ घण्टा काम हुन्छ । डेनमार्कमा हप्तामा ३२ दशमलव ५ घण्टा र नर्वेमा हप्तामा ३३ दशमलव ६ साप्ताहिक कार्यघण्टा तोकिएको छ ।

स्विट्जरल्याण्डको औसत ३४ दशमलव ६ घन्टा हुन्छ र त्यसपछि अस्ट्रिया, बेल्जियम र इटाली छन्, जहाँ हप्तामा ३५ दशमलव ५ घण्टा काम गर्नुपर्छ । अमेरिकामा काम गर्ने हप्ताको घण्टा ३८ दशमलव ७ घण्टामा विस्तार गरिएको छ । ४० घण्टा मानक भन्दा थोरै कम। अहिलेसम्म बेल्जियम, आइसल्याण्ड, स्वीडेन जस्ता देशहरू र जर्मनीका स्टार्टअपहरूले चार दिनको कार्य हप्ता अभ्यासहरू अपनाएका छन्। न्यूजील्याण्डमा उपभोक्ता सामानको विशाल कम्पनी युनिलिभरले हाल पूरा तलबमा चार दिन कार्य हप्ताको परीक्षण गरिरहेको छ। स्कटल्याण्डले पनि चार दिने कार्य हप्ताको परीक्षण गरिरहेको छ ।