२५ वर्षदेखि वेबसाइट र्‍याङ्किङ गर्दै आएको ‘एलेक्सा’ बन्द 

काठमाडौं। २५ वर्षपछि देखि विश्वभरका वेबसाइट र्‍याङ्किङ मापन गर्दै आएको साइट एलेक्सा बन्द भएको छ। अमेजनले गत डिसेम्बरमै आफ्नो सहायक कम्पनी मे १ देखि एलेक्सा बन्द गर्ने योजना सार्वजनिक गरेको थियो। सोही अनुसार वेबसाइटको र्‍याङ्क मापन गर्दै आएको यो साइट आइतबारदेखि बन्द गरेको हो।

साईटमा अहिले सेवा समाप्ति भएको सूचना प्रकाशन गरिएको छ। भनिएको छ ‘‘हामीले एलेक्सालाई १ मे २०२२ मा सेवा अन्त गरेका छौँ। दुई दशकभन्दा बढी तपाईँलाई तपाईँका डिजिटल दर्शकहरू फेला पार्न, पुग्न र रूपान्तरण गर्न मद्दत गरेका थियौँ। सामग्री अनुसन्धान, प्रतिस्पर्धी विश्लेषण, किवर्ड अनुसन्धान र अन्य धेरैको लागि तपाईँको हामीलाई स्रोत बनाउनुभएकोमा धन्यवाद।’’

एलेक्साले कुनै पनि वेबसाइटमा आउने ट्राफिक डेटाका आधारमा वेबसाइटहरूको र्‍याङ्किङ  मापन गर्ने गर्थ्यो। नेपालमा पनि यो साइट हेरेर आफ्नो साइटको  र्‍याङ्किङ  हेर्ने गरेका थिए।

एलेक्साले कुनै पनि वेबसाइटको सर्च इन्जिन अप्टमाइजेसन (एसइओ), अन्य प्रतिस्पर्धी कम्पनीको वेबसाइटको एनालिटिक डेटा समेत उपलब्ध गराउँदै आएको थियो।