शंकास्पद पैसाबारे बार्गेनिङ भएको सूचना पाएको थिएँ, के हो थाहा छैन : अर्थमन्त्री

काठमाडौं। अमेरिकाबाट आएको शंकास्पद ४० करोड छुटाउन अर्थमन्त्री जनार्दन शर्मा नै सक्रिय रहेको आरोप लागिरेहको बेला उनले यस विषयमा स्पष्टीकरण दिएका छन्। उनले राष्ट्र बैंकको सञ्चालक समितिबाटै बार्गेनिङ भइरहेको सूचना पाए पनि आधिकारिक रूपमा के हो भन्ने थाहा नपाएको बताए।

उनले अछामका पृथ्वीबहादुर शाहका खातामा अमेरिकाबाट आएको करोडौं रकम फुक्का गरिदिन राष्ट्र बैंकको सञ्चालक समितिमा रहेका एक सदस्यले नै बार्गेनिङ गरेको आफूले सूचना पाएको बताएका हुन्।

शुक्रबार नेपाल राष्ट्र बैंकले आयोजना गरेको ‘नेसनल कन्फ्रेन्स अन इकोनमिक्स एण्ड फाइनान्स’ विषय कार्यक्रममा मन्त्री शर्माले अमेरिकाबाट आएको करोडौं रकम फुक्का गरिदिन राष्ट्र बैंकको सञ्चालक समितिमा रहेका एक सदस्यले ३० हजार डलर माग गरेको सूचना पाएको बताए। उनले राष्ट्र बैंकका गोप्य सूचनाहरू राष्ट्र बैंककै उच्च अधिकारीहरूले मिडियामा दिने गरेको आरोप लगाए।

उनले प्रश्न गरे, ‘‘कुनै नागरिक समस्या परेर निवेदन दियो के रहेछ हेरिदिनुस् भन्दा मिडिया खोजेर त्यहाँ गोप्य कुराहरू किन पुर्‍याइन्छ?”  उनले राष्ट्र बैंकमा बदमासी भइराखेको र एउटा सञ्चालक समितिले बार्गेनिङ गरेको सुनेको तर आधिकारिक कुरा आफूलाई थाहा नभएको बताए। उनले भने, ‘‘कतिपय रिर्पोट गर्नुपर्ने सूचना रिर्पोट हुँदैन, बदमासी भइरहेको हुन्छ। एउटा सञ्चालक समितिले बार्गेनिङ गरेको सुनेको छु तर आधिकारिक कुरा थाहा छैन मलाई।”

त्यस्तै अर्थमन्त्री शर्माले नेपाल र श्रीलंकाबीच तुलना हुन नसक्ने बताउनु भयो। उनले श्रीलंका र नेपालको ऋणको ,उत्पादन क्षेत्र ,विदेशी लगानी र ऋण सायताको कुरालाई हेर्दा समेत तुलना नहुने बताए। मन्त्री शर्माले अहिले केही मानिसहरूले नेपाललाई श्रीलंका बनाउन खोज पनि आफूले उनीहरूको सपना पूरा गर्न नदिने बताए।