एएफसी एशिययन कप २०२३ छनोटः नेपाल कठिन समूहमा

काठमाडौं। नेपालले एएफसी एशियन कप २०२३ छनोटको तेस्रो चरणअन्तर्गत समूह ‘ए’ मा आयोजक कुवेतसहित जोर्डन र इन्डोनेसियासँग प्रतिस्पर्धा गर्ने भएको छ।

चीनमा आयोजना हुने एएफसी एशियन कपका लागि यसअघि नै आयोजक चीनसहित १३ टोली छनोट भइसकेका छन्। तेस्रो चरणमा सहभागी २४ टोलीलाई ६ समूहमा विभाजन गरिएको छ। जसअन्तर्गत प्रत्येक समूहको विजेता र उत्कृष्ट ४ उपविजेता टोलीले पनि एशियन कपमा स्थान बनाउनेछन्।

नेपालले जुन ८ मा जोर्डन, जुन ११ मा कुवेत र जुन १४ मा इन्डोनेशियाको सामना गर्नेछ। नेपालले कतार विश्वकप २०२२ को एशियाली छनोटमा पनि कुवेत र जोर्डनसँग प्रतिस्पर्धा गरेको थियो।

नेपालले सबै खेल सेन्ट्रल भेन्युको रूपमा रहेको कुवेतमा खेल्नेछ। त्यस्तै समूह ‘बी’ मा मंगोलियासहित यमन र फिलिपिन्स, प्यालेस्टाइन छन् भने समूह ‘सी’ मा उज्वेकिस्तान, श्रीलंका, माल्दिभ्स र थाइल्यान्ड, समूह ‘डी’ मा भारत, कम्बोडिया, अफगानिस्तान र हङकङ, समूह ‘ई’ मा मलेसिया बंगलादेश, तुर्केमिनिस्तान र बहराइन तथा समूह ‘एफ’ मा किर्गिस्तान, सिंगापुर, म्यानमार र ताजिकिस्तान छन्।