पूर्व अमेरिकी राष्ट्रपति बाइडेनलाई प्रोस्टेट क्यान्सर

काठमाडौं । पूर्व अमेरिकी राष्ट्रपति जो बाइडेनलाई प्रोस्टेट क्यान्सर भएको पत्ता लागेको छ, जुन उनको हड्डीसम्म फैलिएको छ। उनको कार्यालयले आइतबार एक विज्ञप्ति जारी गर्दै यसबारे जानकारी दिएको हो।

८२ वर्षीय बाइडेनलाई गत शुक्रबार क्यान्सर भएको पत्ता लागेको थियो। गत हप्ता उनले पिसाबसम्बन्धी समस्याका लागि चिकित्सकलाई भेटेको बीबीसीले उल्लेख गरेको छ ।

क्यान्सर रोग अनुसन्धान यूकेका अनुसार, यो क्यान्सर रोगको थप आक्रामक रूप हो, जसलाई १० मध्ये ९ को ग्लीसन स्कोरले चित्रण गरिएको छ। यसको अर्थ उनको रोगलाई ‘उच्च-ग्रेड’ को रूपमा वर्गीकृत गरिएको छ र क्यान्सर कोषहरू छिट्टै फैलिन सक्छन्।

राष्ट्रपति डोनाल्ड ट्रम्पले आफ्नो सामाजिक सञ्जाल प्लेटफर्म ट्रुथ सोसलमा  उनी र प्रथम महिला मेलानिया ट्रम्प  बाइडेनको यसबारेको खबर  सुनेर दुखी भएको बताएका छन् । उनले भने, ‘हामी जोको छिटो र सफल स्वास्थ्यलाभको कामना गर्दछौं।’

बाइडेनको कार्यकालमा उपराष्ट्रपति बनेकी कमला ह्यारिसले  उनी र उनका पति डग एम्हफ बाइडेन परिवारको लागि प्रार्थना गरिरहेको एक्समा लेखेकी छन् ।

‘जो एक लडाकु हुन् – र मलाई थाहा छ उनले यो चुनौतीलाई त्यही शक्ति, लचकता र आशावादका साथ सामना गर्नेछन् जसले उनको जीवन र नेतृत्वलाई सधैं परिभाषित गरेको छ,’ ह्यारिसले लेखेकी छन् ।

अमेरिकी क्यान्सर सोसाइटीका प्रोस्टेट क्यान्सर चिकित्सक डा. विलियम दाहुतले  बाइडेनको   क्यान्सर प्रकृतिमा बढी आक्रामक रहेको बीबीसीलाई बताए।

‘सामान्यतया, यदि क्यान्सर हड्डीहरूमा फैलिएको छ भने, हामी यसलाई निको पार्न सकिने क्यान्सर मान्दैनौं,’ डा. दाहुतले भने।

बाइडेन अमेरिकी इतिहासमा पद धारण गर्ने सबैभन्दा वृद्ध व्यक्ति हुन्। उनी  ह्वाइट हाउसबाट बाहिरिएपछि सार्वजनिक रूपमा कमै देखिएका छन्।

उनले सन् २०१५ मा आफ्नो जेठो छोरा ब्यूलाई मस्तिष्क क्यान्सरबाट गुमाएका थिए।