धुर्मुस-सुन्तलीले धेरै दुःख पाए, माया लाग्छ : प्रधानमन्त्री

काठमाडौं । प्रधानमन्त्री केपी शर्मा ओलीले धुर्मुस सुन्तली फाउन्डेसनले गौतम बुद्ध क्रिकेट रङ्गशालाको काम गाह्रो छ भन्दा भन्दै पनि सुरु गरेको बताएका छन् ।

काभ्रेपलाञ्चोकको बनेपा नगरपालिका–१० मा निर्माण हुने ‘सिनेपा’ नामक चलचित्र छायाङ्कन स्टुुडियोको उद्घाटन गर्दै उनले रङ्गशाला सुरु गर्दा गाह्रो छ बाबुनानु नथाल भन्दाभन्दै धुर्मुस सुन्तलीले क्रिकेट मैदान सुरु गरेको भन्दै धेरै दुःख पाएको बताए ।

उनले भने, “मैले गाह्रो छ बाबुनानु त्यहाँ नथाल भन्दाभन्दै धुर्मुस सुन्तलीले क्रिकेट मैदान सुरु गरेर धेरै दुःख पाए । माया लाग्छ । तर, त्यो क्रिकेट मैदान पनि बन्छ । उनीहरुको दुःख कष्ट पनि हट्छ एकदिन । मैले त यही दुःख पाइन्छ भनेर नगर भनेको हो । यति ठूलो काम आँट्या एक दुई वटा केही साना कामहरुमा साथीभाइहरु धेरै नै हौसिन्छन् । हामी छौँ भन्छन् । चन्दा उठाएर नै बनाइन्छ भन्छन् तर सहयोग नगर्न सक्छन् ।”