२३ वर्षपछि खाग तस्करी आरोपमा पक्राउ, पक्राउ परेपछि कोरोना संक्रमित

काठमाडौं। गैंडाको खाग चोरी गरेको मुद्दामा फरार रहेका एक अभियुक्तलाई निकुञ्ज प्रशासनले २३ वर्षपछि पक्राउ गरेको छ। पक्राउ पर्नेमा कालिका नगरपालिका–२ बस्ने ५८ वर्षीय कृष्णप्रसाद न्यौपाने रहेका छन्।

न्यौपानेलाई विसं २०५७ माघ २५ गते गैंडा मारी खाग तस्करी गरेको अभियोगमा १० वर्ष कैद र एक लाख जरिवाना तोकेको थियो।

उनलाई यही माघ ७ गते पक्राउ गरी सोमबार सार्वजनिक गरिएको हो। विभिन्न स्थानमा लुकीछिपी बसेको अवस्थामा काठमाडौँ जिल्लाको तारकेश्वर नगरपालिका–७ फुटुङ्गबाट पक्राउ गरिएको हो।

निकुञ्जका सूचना अधिकारी गणेशप्रसाद तिवारीका अनुसार पक्राउ परेका न्यौपानेलाई पक्राउ परेसँगै उनलाई कोभिड–१९ सङ्क्रमण देखिएको थियो।

कोभिड सङ्क्रमण नेगेटिभ आएसँगै उनलाई कारागार कार्यालय भरतपुर पठाइएको उनले जानकारी दिए।

२८ कात्तिक २०५५ सालमा निकुञ्जको अमृते पोष्टबाट करिब एक दशमलव पाँच किलोमिटर पूर्वखाडलमा पारी गैंडा मारी खाग तस्कर गरेको अभियोग उनमा लागेको थियो।

सो घटनामा १२ जना आरोपित भएका थिए।