अमेरिकासँग नझुक्ने चीनको रणनीति, अतिरिक्त शुल्क बढाएर १२५ प्रतिशत पुर्‍यायो

काठमाडौं । चीनले फेरि एक पटक अमेरिकाबाट आयात हुने उत्पादनहरूमा कर बढाएको छ । अब यो अतिरिक्त शुल्क १२५ प्रतिशत पुगेको छ ।

यसअघि बुधबार चीनले अमेरिकी सामानमा ८४ प्रतिशत कर लगाउने घोषणा गरेको थियो । चीनले लगाएको नयाँ भन्सार दर शनिबारदेखि लागू हुने बीबीसीले जनाएको छ ।

यद्यपि, चीनले यो पनि भनेको छ, “यदि अमेरिकाले यसपछि पनि कर बढायो भने पनि बदला लिने छैनौँ ।”

“यो मजाक बन्नेछ,” चीनको वाणिज्य मन्त्रालयका प्रवक्ताले थपे, “करले अमेरिकाको “धम्की र दबाब” थप पर्दाफास गर्नेछ ।”

गत हप्ता मात्र अमेरिकी राष्ट्रपति ट्रम्पले चीनमाथि थप ३४ प्रतिशत कर लगाउने घोषणा गरे । यो अप्रिल ९ मा लागू हुने भनिएको थियो, तर त्यसको केही घण्टा अघि ट्रम्पले अर्को ५० प्रतिशत ट्यारिफ बढाउने घोषणा गरे ।

प्रतिक्रियामा, चीनले बुधबार अमेरिकी सामानहरूमा ५० प्रतिशतले कर बढाएर ८४ प्रतिशत पुर्‍यायो ।

बिहीबार अमेरिकाले चीनमा १४५ प्रतिशत कर लगाउने घोषणा गर्‍यो र पारस्परिक करलाई एक समान १० प्रतिशत मा घटायो, जबकि अन्य देशहरूलाई ९० दिनको राहत दियो ।

सीले भने – चीन कसैसँग डराउँदैन

अमेरिकासँग बढ्दो कर विवादका बीच चिनियाँ राष्ट्रपति सी जिनफिङले पहिलो पटक बयान दिएका छन् । उनले भने, “चीन कसैसँग डराउँदैन । विगत ७० वर्षमा चीनको विकास कडा परिश्रम र आत्मनिर्भरताको परिणाम हो । चीन कहिल्यै पनि अरूको परोपकारमा भर परेको छैन । संसार जतिसुकै परिवर्तन भएपनि चीन चिन्तित हुनेछैन ।”

सीले व्यापार युद्धमा कुनै पनि विजेता नहुने बताए । “संसारको विरुद्धमा जानु भनेको आफ्नो विरुद्धमा जानु हो,” स्पेनी प्रधानमन्त्री पेड्रो सान्चेजसँगको भेटमा उनले यसो भने । सान्चेज शुक्रबार चीन पुगेका थिए ।

ट्रम्पले कर घोषणा गरेपछि सान्चेज चीनको भ्रमण गर्ने पहिलो युरोपेली नेता हुन् । उनले पछिल्लो २ वर्षमा तीन पटक चीनको भ्रमण गरिसकेका छन् । सान्चेजले करको बारेमा ट्रम्पको पनि आलोचना गरे । उनले अप्रिल ८ मा भनेका थिए, “ट्रम्पको करले युरोपलाई नयाँ बजार खोज्न बाध्य पार्नेछ ।”

यसबीच युरोपेली देशहरू र चीन दुवैले आफ्नो सम्बन्ध सुधार गर्ने बारेमा विचार गर्दैछन् ।

सी चिनफिङको फोनको पर्खाइमा छन् ट्रम्प

अमेरिका र चीनबीचको व्यापार युद्धले विश्व अर्थतन्त्रमा पर्ने असर