अर्को विश्वकप खेल्नेबारे के भन्छन् रोहित शर्मा ?

काठमाडौं । भारतीय क्रिकेट टोलीका कप्तान रोहित शर्माले आफ्नो भविष्यको खेल करिअर र अर्को आईसीसी पुरुष क्रिकेट विश्वकप २०२७ को बारेमा प्रतिक्रिया दिएका छन् ।

उनले भविष्यमा आफ्नो खेल करिअरको बारेमा सबै ढोका खुला राखेको बताए । साथै, सन् २०२७ मा आयोजना हुने अर्को आईसीसी पुरुष क्रिकेट विश्वकपमा भाग लिने वा नलिने भन्ने कुरा अझै निर्णय नभएको उनी बताउँछन् ।

उनले भने, “अहिले नै भन्न गाह्रो हुनेछ । म कति राम्रो खेल्न सक्छु भनेर हेर्न चाहन्छु । अहिले म राम्रो खेलिरहेको छु र यो टोलीसँग जे गरिरहेको छु, त्यसको आनन्द लिइरहेको छु र टोलीले पनि मेरो उपस्थितिको आनन्द लिइरहेको छ, जुन राम्रो कुरा हो ।”

रोहितले थपे, “म सन् २०२७ को बारेमा केही भन्न सक्दिनँ किनकि यो धेरै टाढा छ, तर मैले मेरा सबै विकल्पहरू खुला राखेको छु ।”

यसअघि आईसीसी च्याम्पियन्स ट्रफी जितेपछि रोहितले एकदिवसीयबाट सन्यास लिने बारेमा गरिएका अनुमानहरूलाई खारेज गरेका थिए ।

रोहितले भनेका थिए, “म यो फर्म्याटबाट सन्यास लिने छैन । म यो कुरा स्पष्ट पार्न चाहन्छु ताकि थप अफवाहहरू नफैलिओस् ।”