माओवादीको निर्देशन- स्वामिकार्तिक खापर गाउँपालिकामा एमालेलाई समर्थन नगर्नू

नेपालभ्युज

काठमाडौं । सुदूरपश्चिम प्रदेश नेकपा माओवादी केन्द्रले बाजुराको स्वामिकार्तिक खापर गाउँपालिका उपाध्यक्ष पदमा एमाले उम्मेदवारको पक्षमा प्रचारप्रसार नगर्न स्थानीय समितिलाई निर्देशन दिएको छ ।

प्रदेश इन्चार्ज गिरिराजमणि पोखरेलले बिहीबार विज्ञप्ति जारी गर्दै पार्टी नीति विपरीत एमाले उम्मेदवारको पक्षमा प्रचारप्रसार नगर्न र नेकपा एकीकृत समाजवादीका उम्मेदवार जवा शाहीलाई मतदान गर्न निर्देशन दिएका हुन् ।

माओवादी पालिका कमिटीले एमालेका उम्मेदवार सुलोचना कुमारी भण्डारीलाई समर्थन गरेको प्रचार गरेका थिए ।

पोखरेलले एमाले र माओवादीबीच चुनावी तालमेल भएको विषयलाई लिएर पार्टीले समाजवादी मोर्चा बाहिरका उम्मेदवारलाई समर्थन नगर्न परिपत्र नै पठाएको उल्लेख गरेका छन् ।