अक्सफोर्ड चान्सलर बन्ने सपना देखेका इमरान खान किन आउट भए ?

इस्लामाबाद । पाकिस्तानका पूर्वप्रधानमन्त्री तथा पीटीआई नेता इमरान खानलाई झट्का लागेको छ ।

जेलमा रहेका पाकिस्तानका पूर्वप्रधानमन्त्री इमरान खानले अक्सफोर्ड विश्वविद्यालयको कुलपति बन्नका लागि आवेदन दिएका थिए । तर, विश्वविद्यालयले जारी गरेको अन्तिम उम्मेदवारको सूचीमा उनको नाम समावेश नभएपछि उनलाई झड्का लागेको हो ।

यस सूचीमा भारतबाट तीन जनाको नाम समावेश भएको छ । यसपटक कुलपतिको दौडमा ३८ जनाको अन्तिम नाम घोषणा गरेको छ । जसमा बर्कसेस्थित ब्रेकनेल फरेस्टका प्रथम भारतीय मूलका मेयर अंकुर शिव भण्डारी, अन्तर्राष्ट्रिय उद्यमी प्राध्यापक निर्पाल सिंह पल बङ्गाल र चिकित्सा व्यवसायी प्रतीक तरवाडीको नाम समावेश छ।

पहिलो पटक खुला आवेदन

यसबाहेक पूर्व कन्जरभेटिभ पार्टीका नेता लर्ड विलियम हेग र पूर्व लेबर नेता लर्ड पिटर मन्डेलसन चान्सलरको दौडमा रहेका वरिष्ठ राजनीतिज्ञ हुन् । विश्वविद्यालय प्रशासनले पहिलो पटक खुला आवेदन आह्वान गरेको र कुलपतिको निर्वाचन समितिले नियमबमोजिम सबै आवेदन पुनरावलोकन गरेको बताएको छ ।

यसअघि इमरान खानको पार्टी पीटीआईले अक्सफोर्ड विश्वविद्यालयको कुलपति बन्नको लागि आवेदन दिएको जानकारी दिएको थियो । पीटीआई नेता जुल्फिकार बुखारीले एक्समा एक पोस्टमा भनेका थिए ।

किन आउट भए इमरान खान ?

अब युनिभर्सिटीले जारी गरेको सूचीबाट इमरान खान यस दौडमा नपरेको स्पष्ट भएको छ । अक्सफोर्डले सबै आवेदकहरूलाई आफ्नो निर्णयबारे जानकारी गराएको जनाएको छ।

अक्सफोर्डले अस्वीकारको कुनै कारण नदिए पनि केही विज्ञहरूले खान आफ्नो देशमा आपराधिक सजाय पाएको कारणले उक्त पदका लागि अयोग्य भएको संकेत गरेका थिए।

सन् २०१८ देखि २०२२ सम्म प्रधानमन्त्री रहेका खान भ्रष्टाचारदेखि हिंसा भड्काउनेसम्मका विभिन्न आरोपमा जेलमा छन् । यसलाई उनले राजनीतिक प्रेरित र उनलाई सत्ताबाट टाढा राख्न डिजाइन गरिएको बताउँदै आएका छन् ।

उनले सन् १९७५ मा दर्शनशास्त्र, राजनीति र अर्थशास्त्रको अध्ययन गरेर अक्सफोर्डबाट स्नातक गरेका थिए ।  राजनीतिमा प्रवेश गर्नुअघि खान उत्कृष्ट करियरमा पाकिस्तानको क्रिकेट टोलीको कप्तान थिए ।

कुलपति चयनको लागि पहिलो चरणको मतदान अक्टोबर २८ मा सुरु हुनेछ । जसमा मतदाताले उम्मेदवारको श्रेणी निर्धारण गर्न सक्नेछन्। नोभेम्बर ४ देखि सुरु हुने हप्तामा शीर्ष पाँच उम्मेदवारहरू नोभेम्बर १८ मा सुरु हुने दोस्रो चरणको मतदानमा जान्छन्। अक्सफोर्डको नयाँ कुलपतिको घोषणा नोभेम्बर २५ मा हुने सम्भावना छ।