बीसीसीआईले आईपीएलबाट एकै सिजनमा कमायो ५१२० करोड

काठमाडौं । भारतीय क्रिकेट कन्ट्रोल बोर्ड (बीसीसीआई)को आईपीएलबाट हुने आय ११६ प्रतिशतले बढेको छ । बीसीसीआईको वार्षिक प्रतिवेदनमा यो जानकारी दिइएको हो ।

बोर्डले सन् २०२२ को आईपीएल सिजनबाट २ हजार ३ सय ६७ करोड रुपैयाँ नाफा कमाएको थियो भने सन् २०२३ आईपीएल संस्करणमा ५ हजार १ सय २० करोड रुपैयाँ नाफा कमाएको छ ।

यो बढेको नाफाको सबैभन्दा ठूलो कारण नयाँ मिडिया अधिकार चक्र हो, जसलाई बोर्डले सन् २०२३ देखि सन् २०२७ सिजनसम्मको लागि ४८ हजार ३ सय ९० करोडमा बेचेको छ ।

यसरी सन् २०२२ को आईपीएल सिजनबाट बीसीसीआईको मिडिया अधिकार कमाई ३ हजार ७ सय ८० करोड रुपैयाँ थियो भने सन् २०२३ सिजनमा १३१ प्रतिशतले बढेर ८ हजार ७ सय ४४ करोड रुपैयाँ पुगेको छ । यस अवधिमा बोर्डको फ्रेन्चाइज शुल्क र प्रायोजन रकमबाट पनि आम्दानी बढेको छ ।

फ्रेन्चाइज शुल्कबाट बोर्डको आम्दानी १ हजार ७ सय ३० करोडबाट २२ प्रतिशतले बढेर २ हजार १ सय १७ करोड र प्रायोजनमा ८सय २८ करोडबाट बढेर ८ सय ४७  करोड रुपैयाँ पुगेको छ । यसमा २ प्रतिशतको अलिकति वृद्धि भएको छ ।

सन् २०२३ आईपीएल सिजनमा बोर्डले सबै फ्रेन्चाइजीहरूबीच ४ हजार ६ सय ७० करोड रुपैयाँ बाँड्यो । यो अघिल्लो सिजनमा टोलीहरूले प्राप्त गरेको कुल रकमको दोब्बर भन्दा बढी हो, जब बोर्डले २ हजार २०५ करोड रुपैयाँ वितरण गरेको थियो ।