किन नेपाली फ्यानको निशानामा परिरहेका छन् कोहली ?

काठमाडौं । नेपालमा भारतीय क्रिकेटर विराट कोहलीको समर्थक ठूलो संख्यामा छन् ।

नेपालमा ठूलो संख्यामा क्रिकेटप्रेमी रहेको कारण पनि भारतीय टोलीलाई बलियो समर्थन गरेको देख्न पाइन्छ । त्यसमा पनि कोहलीको फ्यान ज्यादा छन् । उनको विश्वभर नै ठूलो संख्यामा फ्यान रहेका छन् ।

तर, उनी हालै एउटा भिडिओका कारण नेपाली फ्यानहरुको निशानामा परेका छन् । उनीप्रति चर्को गाली तथा आलोचना भइरहेको छ ।

कारण हो, कोहलीले आफ्नो सामाजिक सञ्जालमा पोष्ट गरेको भिडिओमा विश्वको सर्वोच्च शिखर सगरमाथाको तस्वीर समावेश हुनु ।

चारदिन अघि पोष्ट गरेको उक्त भिडिओ भारतीय ओलम्पिक टोलीका लागि पेरिस ओलम्पिक २०२४ का लागि तयार गरिएको हो ।

जसमा सुरुमै सगरमाथा क्षेत्रका हिमालहरुसमेत जोडेर बनाइएको छ । सोहीकारण कोहलीको आलोचना भएको हो । उक्त हिमाल भारतको भनी प्रचार गरिएको भन्ने नेपालीको बुझाई छ ।

आलोचकले उनलाई सत्यतथ्य बुझेर मात्र भिडिओ बनाउन, सेयर गर्न भनेका छन् ।