ओमिक्रोन सङ्क्रमित बढेपछि उच्च स्वास्थ्य सतर्कता, फेरि लकडाउनको त्रास

पछिल्लो एक सातायता कोरोनाभाइरस (कोभिड–१९) को नयाँ भेरियन्ट ओमिक्रोन सङ्क्रमितको सङ्ख्या बढ्न थालेपछि सरकारले देशैभर उच्च स्वास्थ्य सतर्कता अपनाएको छ।

नेपालभ्युज

काठमाडौं। पछिल्लो एक सातायता कोरोनाभाइरस (कोभिड–१९) को नयाँ भेरियन्ट ओमिक्रोन सङ्क्रमितको सङ्ख्या बढ्न थालेपछि सरकारले देशैभर उच्च स्वास्थ्य सतर्कता अपनाएको छ। प्रधानमन्त्री शेरबहादुर देउवाको अध्यक्षतामा बसेको कोभिड–१९ संकट व्यवस्थापन समन्वय केन्द्र (सीसीएमसी) को बैठकले सावधानी अपनाउन निर्देशन छ।

संक्रमण रोकथामका लागि सजगता अपनाउने, सिमानामा होल्डिङ सेन्टर सञ्चालन गर्ने, भारतबाट फर्किएकाको एन्टिजेन परीक्षण र पीसीआर गर्ने, तत्काल स्वास्थ्य संरचना बनाउने, भारतबाट फर्किएकालाई आइसोलेसनमा राख्नेलगायतको काम शुरु हुने भएको छ।

शुक्रबार जिन सिक्वेन्सिङ गर्दा २४ जनामा ओमिक्रोन भेटिएको थियो। भारतमा दैनिक झन्डै एक लाख सङ्क्रमित भेटिन थालेसँगै खुला सिमाना जोडिएको नेपालमा पनि सङ्क्रमितको सङ्ख्या ह्वात्तै बढेको हो।

सीसीएमसीको बैठकमा सीमा नाका र हवाई उडान बन्द गर्नुपर्ने अवस्थासमेत आउन सक्ने विषयमा छलफल भएको थियो। तर कार्यान्वयनको विषयमा भने छलफल भएको छैन।
सङ्क्रमितको सङ्ख्या बढ्दै गएमा पुनः छलफल गरी निर्णय गर्ने तयारी छ।

यससँगै फेरि लकडाउन गरे एक वर्षअघि खुलेको विद्यालय पुनः बन्द हुने त्रास बढेको छ। भर्खरै फस्टाउन थालेको पर्यटन व्यवसायमा पनि अन्योलता छाएको छ।

भारतमा शनिबार मात्र १,४१,९८६ जनामा कोरोना देखिएको छ। छिमेकमा भयावह रूपमा बढिरहेको संक्रमणको असर नेपालमा पनि देखिन थालेको छ। एक सातादेखि संक्रमितको सङ्ख्या दैनिक उकालो लागिरहेको छ। अस्पतालहरूमा संक्रमितको चाप बढ्न थालेको छ। खास गरी पश्चिमी नाका भएर भित्रिनेमा संक्रमणदर धेरै देखिएको छ।

‘