इरानी राष्ट्रपति सवार हेलिकोप्टर भेटिएको दाबी

काठमाडौं । इरानका राष्ट्रपति इब्राहिम रइसी सवार दुर्घटनाग्रस्त हेलिकोप्टर फेला परेको दाबी गरिएको छ । दुर्घटना लगत्तै परिचालित उद्धार टोलीले राष्ट्रपति रइसी सवार हेलिकोप्टर फेला परेको बताइएको छ ।

रेडक्रसलाई उद्धृत गर्दै अधिकांस इरानी मिडियाले भनेका छन् कि उद्धार टोलीले रइसीको हेलिकप्टर फेला पारेको छ । रेडक्रसले राष्ट्रपति र अन्य यात्री बाँचेका छन् वा छैनन् भन्नेबारे भने केही खुलाएको छैन ।

राष्ट्रपति रइसीसहित विदेशमन्त्री होसेन अमीर–अब्दुल्लाहियानसवार हेलिकोप्टर हिजो दुर्घटनामा परेको थियो । खराब मौसमका कारण हेलिकोप्टरले हार्ड ल्याण्डिङ् गर्नु परेको त्यहाँको सरकारी टेलिभिजनले जनाएको छ ।

सरकारी टेलिभिजनका अनुसार राष्ट्रपति सवार हेलिकोप्टर पूर्वी अजरबैजानको पश्चिमी प्रान्त जोफा क्षेत्रमा दुर्घटनामा परेको हो ।

मौसम र भौगोलिक जटिलताका कारण खोज र उद्धार टोली दुर्घटनास्थल सम्म पुग्न निकै सकस परिरहेको छ । सरकारी टिभीले राष्ट्रपति रायसीको गृहनगर मशहद सहरमा समर्थकहरुले प्रार्थना र कुशलताको कामना गरिरहेका दृष्यहरु प्रशारण गरेको छ ।

दुर्घटना वारजाघन सहरनजिकै दिमारको पहाडी संरक्षित वन क्षेत्रमा भएको बताइएको छ । ६३ वर्षीय रायसी आइतबार पश्चिमी प्रान्त जोफा भ्रमणमा गएका थिए । त्यहाँ उनले आफ्ना अजरबैजानी समकक्षी इल्हाम अलिएभसँग मिलेर दुई देशको सीमामा बाँध परियोजनाको उद्घाटन गरेका थिए ।

रायसीको सवारीमा तीनवटा हेलिकोप्टर परिचालन गरिएका थिए । अन्य दुई हेलिकोप्टर सुरक्षितरूपमा आफ्नो गन्तव्यमा पुगेका छन् । तर राष्ट्रपति सवार हेलिकोप्टर भने दुर्घटनामा परेको हो ।
गृहमन्त्री अहमद वाहिदीले खराब मौसमका कारण रायसी सवार हेलिकोप्टरले हार्ड ल्यान्डिङ गरेको बताएको बीबीसीले जनाएको छ ।

यसैबीच, चिनियाँ विदेश मन्त्रालयले इरानी राष्ट्रपति र हेलिकप्टरमा सवार अन्य यात्रीको अवस्था सुरक्षित र स्वस्थ रहेको आशा गरेको बताएको छ ।

चिनिया विदेश मन्त्रालयले जारी गरेको विज्ञप्तिमा चीनले स्थितिलाई नजिकबाट नियालिरहेको भन्दै उद्धार प्रयासका लागि आवश्यक सबै सहयोग उपलब्ध गराउने उल्लेख छ । इरानी राष्ट्रपति रायसीले तेहरान र बेइजिङको सम्बन्धलाई प्रगाढ बनाउन महत्वपूर्ण भूमिका खेल्दै आएका छन् ।