तेस्रो टी–२० मा नेपाल ७६ रनले पराजित, सिरिजमा वेस्ट इन्डिज ‘ए’ लाई अग्रता

काठमाडौं। वेस्ट इन्डिज ‘ए’ विरुद्धको टी–२० क्रिकेट सिरिज अन्तरगत तेस्रो खेलमा नेपाल फराकिलो अन्तरले पराजित भएको छ ।

ब्याटिङ र बलिङ दुवैमा कमजोर प्रदर्शन गरेको नेपाल ७६ रनले पराजित भयो । यो सँगै ५ खेलको सिरिजमा वेस्ट इन्डिजले २-१ को अग्रता बनाएको छ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा टस जितेर पहिले ब्याटिङ गरेको वेस्ट इन्डिज ‘ए’ ले २२८ रनको विशाल लक्ष्य दिएको थियो । तर नेपालले पुरै ओभर समेत खेल्न सकेन ।

नेपाली टिम ४ बल अगाडि नै १५१ रन बनाएर अल आउट भयो । नेपालका लागि लोकेश बम र करण केसीले २८-२८ रन जोडे । कुशल मल्ल २०, विनोद भण्डारी १९ र अनिल साह १४ रनमा आउट भए ।

अन्यले दोहोरो अंकको स्कोर बनाउन सकेनन् । वेस्ट इन्डिज ए का लागि हेडेन वाल्शले ३ विकेट लिए।

पहिले ब्याटिङ गरेको वेस्ट इन्डिज ‘ए’ ले पूरै ओभर खेलेर ३ विकेट क्षतिमा २२७ रन बनाएको थियो । उसका जोनसन चार्ल्सले अविजित ११९ रन बनाए । उनले १३ चौका र ७ छक्का प्रहार गरेका थिए। आन्द्रे फ्लेचरले ५३ रनको योगदान गरे।

सिरिजको पहिलो खेलमा नेपाल विजयी भएको थियो । तर, त्यसपछि लागातार दुई खेलमा पराजित भयो । चौथो खेल बिहीबार हुनेछ।

विश्वकप टिम घोषणाको तयारीमा रहेकाले नेपालले आज केही प्रयोग गरेको थियो । कप्तान रोहित पौडेल थिएनन् भने नियमित रुपमा ओपनिङ गरिरहेका कुशल भूर्तेल र आसिफ शेखलाई पनि राखिएको थिएन ।

विनोद भण्डरी र लोकेश बमले ओपनिङ गरेका थिए । आज कुनै पनि खेलाडी चल्न नसकेकाले चयनकर्तालाई विश्वकपको टिम बनाउन केही सहज भएको छ ।

आज रातिसम्म टि-२० विश्वकपको टिम घोषणा गर्ने क्रिकेट संघ क्यानको तयारी छ ।