प्रधानमन्त्री कपमा आर्मीसँग मधेस फराकिलो अन्तरले पराजित

काठमाडौं। प्रधानमन्त्री कप एकदिवसीय राष्ट्रिय क्रिकेटमा त्रिभुवन आर्मी क्लबले मधेस प्रदेशलाई १२६ रनले पराजित गरेको छ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा ३२१ रनको विशाल लक्ष्य पछ्याएको मधेस ६ बल बाँकी हुँदै १९४ रनमा अलआउट भयो।

मधेसका लागि पवन सराफले ६५ रन बनाए पनि हार टार्न सकेनन् । मयन यादवले ३४ र राजेश यादवले ३२ रन बनाए ।

आर्मीका शाहब आलमले ४, सोमपाल कामीले २ तथा जितेन्द्र मुखिया र कुशल मल्लले १–१ विकेट लिए।

पहिले ब्याटिङ गरेको आर्मीले ३२० रन बनाएको थियो । कप्तान विनोद भण्डारीले शतक प्रहार गरे । उनले ९३ बलमा ९ चौका र ६ छक्का प्रहार गर्दै ११३ रन बनाए । सन्तोष कार्कीले ४२ र कुशल मल्लले ३७ रन जोडे।

मधेसका लागि रंजित कुमारले ५ विकेट लिए । विशाल पटेलले २ तथा रुपेश सिंह र राजेश यादवले १–१ विकेट लिए।