मधेसमाथि सुदूरपश्चिमको जित, बागमतीले लुम्बिनीलाई हरायो

काठमाडौं। प्रधानमन्त्री कप महिला टी–२० क्रिकेट प्रतियोगितामा सुदूरपश्चिम प्रदेशले मधेस प्रदेशलाई पराजित गरेको छ।

मूलपानी क्रिकेट मैदानमा बुधबार भएको खेलमा सुदूरपश्चिमले मधेसलाई ५ विकेटले पराजित गरेको हो। यो सुदूरपश्चिमको लगातार चौथो जित हो।

८३ रनको लक्ष्य सुदूरपश्चिमले १९.५ ओभरमा ५ विकेटको क्षतिमा पूरा गर्यो। सुदूरपश्चिमका लागि कविता जोशीले २६ र सम्झना खड्काले २१ रन जोडे। मधेसका लागि भने साक्क्षी यादवले र कविता गौतमले २–२ तथा पूजा महतोले १ विकेट लिए।

पहिले ब्याटिङ गरेको मधेसले पूरै ओभर खेलेर ७ विकेटको क्षतिमा मात्र ८२ रन बनायो। मधेसका लागि पूजा महतोले २७ र साना प्रविनले अविजित १९ रन बनाए। सुदूरपश्चिमका लागि भने लक्ष्मी साउदले ४ तथा कविता जोशी र जानकी थापाले १–१ विकेट लिए।

५ खेलबाट ८ अंक जोडेको सुदूरपश्चिम अंक तालिकाको तेस्रो स्थानमा छ। ५ खेलबाट २ अंक जोडेको मधेस सातौँ स्थानमा छ।

यस्तै, कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको खेलमा बागमतीले लुम्बिनीलाई ९ रनले पराजित गर्यो।

११० रनको लक्ष्यमा जवाफी ब्याटिङ गरेको लुम्बिनीले पूरै ओभर खेलेर ८ विकेटको क्षतिमा १०० रन बनायो। लुम्बिनीका लागि कप्तान सरस्वती घर्ती मगरले २९ र कमला घर्ती मगरले अविजित २० रन बनाए।

पहिले ब्याटिङ गरेको बागमतीले पूरै ओभर खेलेर ८ विकेटको क्षतिमा १०९ रन बनायो। बागमतीका लागि हेलिशा गुरुङले सर्वाधिक ४६ रन बनाइन्। याशु पान्डे भने १२ रनमा अविजित रहिन्। लुम्बिनीका लागि शर्मिला रोक्काले ३ तथा मनिशन राना, कृतिका मरासिनी, मधु डिसी र कमला घर्ती मगरले १–१ विकेट लिए।

५ खेलबाट ६ अंक जोडेको बागमती चौथो स्थानमा छ भने ५ खेलबाट ४ अंक जोडेको लुम्बिनी पाँचौँ स्थानमा छ।