मुगुमा जीप दुर्घटना हुँदा चार जनाको मृत्यु, पाँच जना घाइते

मुगु। मुगुको सोरु गाँउपालिकाको केन्द्र सोरुकोटबाट जिल्ला सदरमुकाम गमगढीतर्फ छुटेको जीप दुर्घटना हुँदा चार जनाको मृत्यु भएको छ ।

प्रहरीका अनुसार मृत्यु हुनेमा हुम्ला जिल्ला सर्केगाड–२ रिपगाउँका एकै नाम थरका दुई जना राम परियार, सोही ठेगानाका प्रकाश बोहरा र पिउस परियार रहेका छन् ।

सोमबार दिउँसो २ बजे सोरुकोटबाट छुटेको ग १ ज ७७६२ नम्बरको जीप सोही गाँउपालिका–६ सिपपहिरो भन्ने स्थानमा पुग्दा सडकबाट चिप्लिँदा अनियन्त्रित भई दुर्घटना भएको थियो ।

जीप सडकबाट अन्दाजी तीन सय मिटर तल मुगु कर्णाली छेउ पुगेको र जिपमा सवार नौजना मध्ये दुई जनाको घटनास्थलमै र दुई जनाको बाटोमाा मृत्यु भएको जिल्ला कार्यालय मुगुका प्रहरी नायब उपरीक्षक मोहन बस्नेतले जानकारी दिए ।

उनका अनुसार घाइतेमध्ये तीन जनाको अवस्था चिन्ताजनक छ । घटनास्थलबाट घाइते र मृतकहरूलाई आँसीधारा गाउँसम्म जीपमा र फुलीबाट एम्बुलेन्समा राखी जिल्ला अस्पताल लगिएको प्रहरीले जनाएको छ ।

घटनास्थल सदरमुकाम गमगढीबाट तीन घण्टा सडक दूरीमा रहेको छ ।