काबुलको बेलायती दूतावासमा काम गरेर लण्डन पुगेका १३ जना नेपालीलाई देश निकाला गर्ने तयारी

एजेन्सी । सन् २०२१ मा अफगानिस्तानमा तालिवानको शासनकालमा उद्धार गरी बेलायत लगिएका नेपाली सुरक्षा गार्डको समूहलाई बेलायत सरकारले त्यहाँ बस्न नदिने भएको छ ।

उद्धार गरेर बेलायत पुर्‍याएको १९ महिनापछि १३ जना नेपालीलाई बेलायत सरकारले देश निकालाको तयारी गरेको बीबीसी हिन्दीले जनाएको छ । गोर्खा भनेर चिनिने १३ नेपाली सैनिकको यो समूहले काबुलस्थित बेलायती दूतावासको सुरक्षामा काम गर्दथ्यो ।

यी नेपाली नागरिकको उमेर ३७ देखि ६० वर्षसम्म रहेको बताइएको छ । तिनीहरू सबै एक निजी सुरक्षा फर्ममा काम गर्थे । जसलाई काबुलमा बेलायत र क्यानाडाली दूतावासहरूको सुरक्षाको जिम्मेवारी दिइएको थियो।

अगस्ट २०२१ मा अफगानिस्तानको राजधानी काबुल तालिवानको नियन्त्रणमा आएपछि ब्रिटिश सेनासँग काम गरेका हजारौं अफगान र सरकारी कर्मचारीहरूलाई काबुलबाट सुरक्षित रूपमा बाहिर निकालिएको थियो । गत हप्ता लन्डनको एक बाट १० जनालाई हथकडी लगाएर लगिएको केहि गोर्खाका वकिलहरूले बताएका छन् ।

उनीहरु सबै होटलमा बस्दै त्यहाको भान्छामा काम गरिरहेका थिए । गत हप्तादेखि उनीहरु सबैलाई हिथ्रो एयरपोर्ट र ग्याटविक वरपरको इमिग्रेसन रिमुभल सेन्टरमा राखिएको छ ।

यी सबैलाई वैशाख ६ गते देश बाहिर पठाइने विश्वास गरिएको छ । तर यी १३ जनालाई बेलायतमा बस्ने कानूनी अधिकार रहेको यी सैनिकका वकिलहरूले बताएका छन् ।