बल्खुमा ट्रकले स्कुटरलाई ठक्कर दिँदा अध्यागमनका अधिकृतको मृत्यु

नेपालभ्युज

काठमाडौं । बल्खुमा मालवाहक ट्रकले ठक्कर दिँदा स्कुटर चालकको मृत्यु भएको छ ।

आइतबार दिउँसो करिव १२ बजे भएको उक्त दुर्घटनामा अर्घाखाँची छत्रदेव गाउँपालिका-५ चन्द्रागिरि नगरपालिका-१२ सतुंगल बस्ने ३८ वर्षीय भूपति पाण्डेको मृत्यु भएको हो।

दुर्घटनापछि गम्भीर घाइते भएका पाण्डेलाई वयोधा अस्पतालमा पुर्‍याएपछि चिकित्सकले मृत घोषणा गरेका थिए ।

सानेपाबाट कलंकीतर्फ जाँदै गरेको बागमती प्रदेश-०३-००१ ख १७१५ नम्बरको १२ चक्के मालवाहक गाडीले सोही दिशा जाँदै गरेको बा अअ ९८३५ नम्बरको स्कुटरलाई ठक्कर दिएको थियो।

उनी त्रिभुवन अन्तर्राष्ट्रिय विमानस्थल स्थित अध्यागमन विभागमा शाखा अधिकृतका रुपमा कार्यरत थिए।