प्रहरीलाई महिनावारी बुझाउने तस्करहरूको लिस्टसहित पत्रकार महासंघ कैलालीमा निवेदन

धनगढी। कैलालीमा खुल्ला सीमा नाकाबाट समय– समयमा व्यापक मात्रामा सामान तस्करी हुने कुरा कुनै नौलो कुरा होइन । भारतबाट भन्सार छलेर विभिन्न सामान तस्करी गर्ने क्रम रोकिएको छैन । कैलालीको एक सय किलोमिटर खुल्ला सीमाबाट हुने तस्करीका कारण लाखौं राजस्व चुहावट भइरहेको छ ।

कैलालीमा भन्सार कार्यालयसँगै सशस्त्र प्रहरी सीमा सुरक्षा पोस्ट पनि छ । उसको काम सीमा क्षेत्र सुरक्षाका साथै तस्करी रोक्नु पनि हो । तर, कैलालीमा एक पछि अर्को घटना बाहिरिँदै छ ।

सोमबार मात्रै कैलाली प्रहरीलाई महिनावारी रकम बुझाएर खुलेयाम भारतबाट अवैध तस्करी गर्ने गरेको आरोपसहित २० जनाको नाम राखेर पत्रकार महासंघ कैलालीमा उजुरी परेको छ ।

सामाजिक अभियन्ता नामबाट हुलाकमार्फत पठाइएको निवेदनमा जिल्लाको पूर्वी क्षेत्रमा तस्करी गर्ने र प्रहरीलाई महिनावारी रकम बुझाउने गरेको आरोपसहित नाम समेत तोकिएको छ ।

सोमबार पत्रकार महासंघ कैलालीमा सो निवेदन हुलाकमार्फत पुगेको पत्रकार महासंघ कैलालीका अध्यक्ष हिमाल जोशीले बताए । पत्रकार महासंघ कैलालीलाई दिएको निवेदनमा यस्तो भनिएको छ ।

‘महोदय, हाल आएर कैलाली जिल्लामा तस्करहरूको अखडा बनेको छ । निज तस्करलाई प्रहरीका घुमुवाहरूले संरक्षण दिएको हुनाले कैलालीका सम्पुर्ण नाकाहरूबाट विभिन्न चोरी तस्करीका समानहरू भित्र्याउनमा प्रहरी नायब निरीक्षक सुनील चन्द र नन्दराज भट्टले कैलालीका सबै नाकाबाट असुली धन्दा गरी कार्यालय प्रमुखलाई पनि कुनै जानकारी नदिई गुमराहमा राखेको र निजमाथि छानबिन गरी आवश्यक कारबाही होस् भनी यो पत्र पेश गरेका छौँ । चिनीका नाइकेलाई आवश्यक कारबाही गरियोस्, छानबिन गर्दा पुलिस प्रशासनबाट नभई अन्य जनमानसबाट होस्, हाल आएर प्रत्येक ठाउँबाट पैसा उठाउने गरेको र निज दुई जनामाथि छानबिन होस् भनी यो पत्र पेश गरेका छौँ ।

पत्रमा भारतीय मुद्राको कारोबारी, सुन तस्कर, काठ तस्कर, लागुऔषध तस्करहरूसँग समेत निज दुवै जना संलग्न भएकोले  आवश्यक कारबाही गरियोस् ।

यसबारे निष्पक्ष छानबिन गरी दोषी उपर कारबाही हुनुपर्ने महासंघले माग राखेको छ ।

के भन्छ कैलाली प्रहरी ?

यस विषयमा बुझ्दा जिल्ला प्रहरी कार्यालय कैलालीका प्रहरी नायब उपरिक्षक वेद प्रकाश जोशीले छलफलका लागि अहिले बैठक बस्ने तयारी गरेको बताए ।

कोही असन्तुष्ट पक्षले भ्रम फैलाउन यस्तो गरेको हुन सक्ने बताउँदै जोशीले वास्तविकता बाहिर ल्याउने बताए । पत्रकार महासंघमा आएको उजुरीलाई गम्भीरताका साथ लिएर अनुसन्धान गर्ने उनले बताएका छन् ।

जिल्ला प्रहरी कार्यालय कैलालीका प्रमुख देवेन्द्रबहादुर पालले पनि आवश्यक अनुसन्धान गर्ने बताए । उनले भने ‘यसको गहिराइमा हामी जान्छौँ सम्बन्धित व्यक्तिलाई सोधपुछ गर्छौं र दोषी ठहरिए कारबाही गर्नेछौँ ।’