इन्गेजमेन्ट टुटेपछि केटीले गरिन् पेट्रोल छर्किएर आत्मदाह, केटा पक्राउ

काठमाडौं। दरबारमार्गस्थित केल्मी ब्रान्डको शोरुम सञ्चालिका २७ वर्षीया पुष्पा न्यौपानेको जलेर मृत्यु भएको छ । धुम्बाराही घर भएका सुदन सङ्ग्रौलासँग इन्गेजमेन्ट गरेकी पुष्पाले आइतबार केटाको घर अगाडी गएर पेट्रोल छर्केर आफैँलाई आगो लगाएकी थिइन्।

कीर्तिपुरस्थित बर्न अस्पतालमा उपचाररत उनको हिजो मृत्यु भएको हो। आत्महत्या दुरुत्साहनको आरोपमा प्रहरीले सुदनलाई पक्राउ गरेको छ। सुदनविरुद्ध आत्महत्या दुरुत्साहन गरेको कसुरमा अदालतबाट म्याद लिएर अनुसन्धान भइरहेको महानगरीय प्रहरी वृत्त चक्रपथका डीएसपी अंगुर जीसीले बताए।

उनले भने, ‘‘घटनाको अनुसन्धान हुँदै छ । आत्महत्या दुरुत्साहनको कसुरमा आरोपितलाई पक्राउ गरी अदालतबाट हिरासतमा राख्ने म्याद थप गरिएको छ।’’

काठमाडौँ महानगरपालिका–१० बुद्धनगर घर भएकी पुष्पाले २०७९ भदौ १८ मा सुदनसँग इन्गेजमेन्ट गरेकी थिइन्। तर, केटा पक्षले कार्तिक १७ मा इन्गेजमेन्टमा लिएको गहना र दक्षिणा फिर्ता गरेपछि दुई पक्षबीच विवाद चर्किएको थियो।

विवाहअघि घुमाउने, परिवारसँग बसेर रमाइलो गर्ने, एकअर्काप्रति माया गर्ने गरेका सुदनले इंगेजमेन्टपछि क्रमशः पुष्पालाई पटक–पटक मानसिक यातना दिएको र त्यसकै पीडा सहन नसकेर आत्महत्या गरेको परिवारको आरोप छ ।

‘‘५\७ महिनाअघि मात्रै छोरीले स्नातकोत्तर उत्तीर्ण गरेपछि काम गर्न थालेकी थिइन। हाम्रो आफ्नै शोरुममा उनी काम गर्थिन्, त्यहीँ आउँदा केटासँग चिनजान भएर पछि विवाह गर्नेसम्मको सम्बन्ध भएको थियो,’ पुष्पाका काका उत्तमले भने, ‘इंगेजमेन्टअघि केटा र परिवार सबैले राम्रो व्यवहार गरेका थिए । दुवै परिवारबीच आउजाउ हुन्थ्यो । तर, त्यसपछि भने खै किन हो, बिस्तारै छोरीलाई मानसिक यातना दिने, अनावश्यक शंका गर्ने, अभिभावकलाई फोन गरेर अनावश्यक तनाव दिने काम भयो । धाकधम्की दिनेसम्मका पनि व्यवहार हुँदै गयो। त्यही क्रममा शनिबार इन्गेजमेन्ट तोडिएको थियो, त्यसको भोलिपल्ट छोरी केटाको घरनजिकै जलेको खबर आयो ।’’